Ózbekstan Respublikası Prezidenti Shavkat Mirziyoev Franciya Respublikası Prezidenti Еmmanuel Makronnıń mirát etiwine bola 11-13-mart kúnleri mámleketlik sapar menen usı mámlekette boldı.

Mámleketimiz basshısı 13-mart kúni Parij qalasındaǵı Burban sarayında Franciya Milliy májilisi Baslıǵı Yael Braun-Pive menen ushırasıw ótkerdi.
Eki mámleket arasındaǵı parlamentleraralıq almasıwdı jáne de keńeytiw máseleleri kórip shıǵıldı.
Bul sapar etiwdiń tariyxıy áhmiyeti, Ózbekstan hám Franciya arasında strategiyalıq sheriklik qatnasıqları ornatılǵanı úlken minnetdarshılıq penen atap ótildi.
Franciya parlamentiniń tómengi palatası basshısı Jańa Ózbekstanda ámelge asırılıp atırǵan demokratiyalıq ózgerislerdi, wákillik uyımlarınıń roli, hayal-qızlar, balalar, jaslar hám mayıplıǵı bolǵan shaxslardıń huqıqları hám ekologiyalıq qáwipsizlik kepillikleri kúsheygenin joqarı bahaladı.
Ózbekstan-Franciya parlamentleraralıq forumın shólkemlestiriw hám «jol kartası» tiykarında doslıq toparlarınıń jumısın qayta tiklew máseleleri dodalandı.
Ózbekstan jetekshisi Milliy májilis Baslıǵın usı jılı aprel ayında Tashkent qalasında bolıp ótetuǵın Parlamentleraralıq awqamnıń 150-yubiley assambleyasında qatnasıw ushın mámleketimizge mirát etti.
Ushırasıw juwmaǵında Ózbekstan Respublikası Prezidenti Húrmetli miymanlar kitabında qol jazbasın jazıp qaldırdı.
Franciyaǵa mámleketlik sapar sheńberinde Ózbekstan Respublikası Prezidenti Shavkat Mirziyoev Parij qalası meri Ann Idalgo menen ushırastı.

Sóylesiw aldında mámleketimiz basshısı paytaxt merin jazǵı Oimpiada hám Paralimpiada oyınları tabıslı ótkerilgeni menen qızǵın qutlıqladı, sonday-aq, Parij kóshelerinen birine Samarqand ataması berilgeni ushın minnetdarshılıq bildirdi.
Óz gezeginde, Ann Idalgo Ózbekstan basshısına olimpiada ilajları dáwirinde jámiyetlik qáwipsizlikti támiyinlewde kórsetilgen járdem ushın minnetdarshılıq bildirdi.
Ushırasıwda Ózbekstan Prezidentiniń bul saparı tariyxıy nátiyjeler menen juwmaqlanǵanı –eki mámleket arasındaǵı kóp táreplemeli baylanıslar strategiyalıq sheriklik dárejesine kóterilgeni úlken qanaatlanıwshılıq penen atap ótildi.
Tashkent hám Parij arasındaǵı ámeliy birge islesiw hám almasıwlardı qol qoyılǵan kelisim tiykarında jedellestiriw máseleleri dodalandı.
Qala qurılısın rejelestiriw, «jasıl» aymaqlar qurıw, jámiyetlik transporttı rawajlandırıw, sanlastırıw, sonday-aq, qala koomunikaciyaların modernizaciyalaw hám olardan turaqlı paydalanıw boyınsha tájiriybe almasıw usılardıń qatarına kiredi.
Bunnan tısqarı, óz-ara kórgizbeler, mádeniyat hám kórkem óner kúnleri, sayaxatshılıq hám gastronomiyalıq festivallar ótkeriw máseleleri kórip shıǵıldı.
Ushırasıw juwmaǵında Parij kóshelerinen birine Samarqand ataması berilgenine baǵıshlanǵan rásmiy máresim bolıp ótti.
Mámleketimiz basshısı hám Parij meri Ózbekstan Prezidenti húrmetli miyman sıpatında Parij qalasında bolǵanı haqqındaǵı birgeliktegi hújjetke qol qoydı. Bul estelik jarlıǵı meriya muzeyinde kórsetiledi.
Sonıń menen Ózbekstan Respublikası Prezidenti Shavkat Mirziyoevtiń Franciya Respublikasına tariyxıy mámleketlik saparınıń ilajlarǵa bay baǵdarlaması juwmaǵına jetti.
Mámleketimiz basshısı Parij qalasında Franciya Prezidenti Еmmanuel Makron menen nátiyjeli sóylesiwler ótkerdi.
Sammit juwmaǵında Strategiyalıq sheriklik qatnasıqların ornatıw haqqında birgeliktegi deklaraciya, sonday-aq, birge islesiwdiń hár qıylı baǵdarları boyınsha kelisimlerdiń salmaqlı toplamı qabıl etildi.
Prezidentimiz Franciyanıń jetekshi kompaniya, bank hám shólkemleriniń basshıları menen dógerek sáwbetinde qatnastı. Ulıwma bahası 6,5 milliard dollar bolǵan anıq kooperaciyalıq joybarlardı ámelge asırıwdı názerde tutatuǵın Investiciyalıq hám innovaciyalıq tarawlarda birge islesiw baǵdarlaması qabıl etildi.
Eki tárepleme birge islesiwdi rawajlandırıwǵa qosqan salmaqlı úlesi ushın Ózbekstan Respublikası Prezidenti Franciya Respublikasınıń joqarı sıylıǵı – Húrmetli legion ordeni menen sıylıqlandı.

YuNESKO Bas direktorı Odri Azule menen sóylesiwlerde birge islesiwdi jáne de rawajlandırıw perspektivaları hám shólkem Bas konferenciyasınıń Samarqand qalasındaǵı 43-sessiyasına tayarlıq kóriw máseleleri dodalandı.
Sapardıń ilajları juwmaqlanǵannan soń, «Orli» xalıqaralıq aeroportında mámleketimiz basshısın Franciya sport hám jaslar ministri Mari Barsak hám basqa rásmiy shaxslar shıǵarıp saldı.

ÓzA