Bas prokurordıń orınbasarı D.Kasimov basshılıǵındaǵı jumısshı topar tárepinen Qaraqalpaqstan Respublikasında ximiya sanaatı tarawında sırt el investiciyasınıń qatnasıwında ámelge asırılıp atırǵan iri joybarlardıń házirgi jaǵdayı ornına shıqqan halda úyrenildi.

Atap aytqanda, Qońırat rayonındaǵı «Qońırat soda zavodı» juwapkershiligi sheklengen jámiyeti tárepinen ámelge asırılıp atırǵan bahası 238 million AQSh dollarlıq «Soda islep shıǵarıw quwatlılıǵın keńeytiw hám basqa túrdegi ónimler islep shıǵarıwdı shólkemlestiriw» joybarı menen tikkeley investorlardıń qatnasıwında tanısıldı.
Investiciyalardı ózlestiriw esabınan kárxanada keleshekte 250den aslam jergilikli xalıq turaqlı jumıs penen támiiynleniwi hám jılına 250 mıń tonna soda hám basqa túrdegi ónim islep shıǵarılıwı rejelestirilgenin atap ótiw zárúr. Úyreniwde juwapkerlerge joybar sheńberinde ámelge asırılıp atırǵan qurılıs jumısların jedellestiriw boyınsha tapsırmalar berildi.
Bunnan tısqarı, Kegeyli rayonındaǵı bahası 6,3 million AQSh dollarlıq «Kegeyli bereket násilli qus» jeke menshik kárxanasınıń «Qusshılıqtı shólkemlestiriw» hám «Lanko miya» jeke menshik kárxanasınıń «Qurılıs ónimlerin islep shıǵarıw» joybarları ornına shıqqan halda úyrenildi.
Úyreniw dawamında usı kárxanalardıń jumısında kommunikaciya tarmaǵın tartıw, ónimler ushın muwapıqlıq sertifikatların alıw hám basqa máselelerge baylanıslı mashqalalar bar ekenligi anıqlandı. Bul mashqalalardıń tez pursatta nızamlı sheshiliwi boyınsha juwapker uyım wákillerine tapsırma berilip, orınlanıwı qadaǵalawǵa alındı.

ÓzA