Kúni keshe Ózbekstan Respublikası Nızamshılıq palatasınıń Spikeri Nuriddin Ismoilovtıń Rossiya Federaciyası Federal Majlisi Mámleketlik dumasınıń Baslıǵı Vyacheslav Volodin basshılıǵındaǵı delegaciya aǵzaları menen ushırasıwı bolıp ótti. Bul haqqında tómengi palata baspasóz xızmeti xabar berdi.

Sóylesiw aldında miymanlarǵa mámleketimizde ámelge asırılıp atırǵan keń kólemli reformalar, Nızamshılıq palatasınıń nızam dóretiwshiligi baǵdarındaǵı jumısı, palatanıń komitetleri, komissiyalarınıń tiykarǵı wazıypaları haqqında tolıq maǵlıwmat berildi.
Óz gezeginde, V.Volodin shın kewilden qabıllaǵanı ushın minnetdarshılıq bildirip, eki mámleket arasındaǵı qatnasıqlardıń sońǵı jılları kún sayın keńeyiwi hám bekkemleniwi, hár qıylı tarawlardaǵı kóp táreplemeli birge islesiwdiń rawajlanıwında baqlanıp atırǵan turaqlı unamlı tendenciyanı qanaatlanıwshılıq penen atap ótti.
Sonday-aq, óz-ara qatnasıqlardıń jedel rawajlanıp atırǵanı, Ózbekstan hám Rossiya arasındaǵı qatnasıqlar jańa formatqa iye bolǵanı, birge islesiwdiń barlıq baǵdarlarında óz-ara baylanıslar jedellesip, kóp tárepleme sóylesiwler bekkemlenip atırǵanı atap ótildi.
Miyman Ózbekstanda barlıq tarawlarda ámelge asırılıp atırǵan keń kólemli reformalardı joqarı bahalap, Prezident Shavkat Mirziyoev tárepinen alıp barılıp atırǵan regionallıq baylanıslardı bekkemlewge qaratılǵan konstruktivlik hám ashıq sırtqı siyasatı maqtawǵa ılayıq ekenligin bildirdi.
Eki tárepleme baylanıslardı rawajlandırıwda áhmiyetli faktor bolǵan parlamentleraralıq birge islesiwdi jáne de keńeytiw hám sapa jaǵınan jańa basqıshqa kóteriw hár tárepleme paydalı ekeni atap ótilip, Ózbekstan Respublikası Oliy Majlisi Nızamshılıq palatası menen Rossiya Federaciyası Federal Májilisi Mámleketlik Dumasınıń Birge islesiw boyınsha parlamentleraralıq komissiyasınıń jumısın jetilistiriw zárúr ekenligi atap ótildi.
Sóylesiw dawamında parlamentleraralıq forumlar, partiyalar hám frakciyalararalıq sóylesiwler ótkeriw boyınsha pikir alısılıp, birge islesiwdi rawajlandırıwdıń perspektivalı baǵdarları belgilep alındı.

M.Komilova,
ÓzA