Qaraqalpaqstan Respublikası mámleketimiz basshısınıń «Múbárek ramazan ayın múnásip ótkeriw haqqında»ǵı qararınıń orınlanıwın támiyinlew sheńberinde «Ramazan – saqawat, awızbirshilik hám keńpeyillik ayı» ideyası tiykarında keń kólemli qayır-saqawat ilajları ótkerilmekte.

Sonıń ishinde, mútáj hám ilim-aǵartıwshılıq jolında izlenip atırǵan jaslarǵa járdem beriw, shańaraqlıq qatnasıqlardı bekkemlew, húrmet hám miyirim-shápáát qádiriyatların kórsetiw, qorshaǵan ortlaqtı saqlaw, muqqades zıyarat orınların abadanlastırıw jumısları alıp barılmaqta. Sonday-aq, sociallıq qorǵawǵa mútáj, mayıplıǵı bolǵan shańaraqlarǵa, jetim hám ata-anasınıń qaramaǵınan ayırılǵan balalardı sociallıq qorǵawǵa ayrıqsha itibar qaratılmaqta.
Múbárek Ramazan ayı múnásibeti menen Qaraqalpaqstan Respublikası Ministrler Keńesi hám «Vaqf» qayırqomlıq jámiyetlik fondı Qaraqalpaqstan filialı tárepinen jetim hám ata-anasınıń qaramaǵınan ayırılǵan balalar ushın «Balalarǵa beriń dúnyanı» dep atalǵan qayırqomlıq ilajı ótkerildi. Saudiya patshalıǵı járdem hám qayırqomlıq isleri orayı tárepinen jiberilgen dáslepki azıq-awqat ónimlerinen ibarat qayırqomlıq járdemi 461 kem támiyinlengen, sociallıq qorǵaw, baǵıwshısınan ayırılǵan, mayıplıǵı bolǵan shańaraqqa tarqatıldı.
Bul iygilikli baslama «Vaqf» qayırqomlıq jámiyetlik fondı tárepinen Sociallıq qorǵaw milliy agentligi Qaraqalpaqstan Respublikası basqarması menen birgelikte shólkemlestirildi. Sonday-aq, Túrkiyanıń Ózbekstandaǵı elshixanası tárepinen biyǵarez berilgen azıq-awqat ónimleri toplanǵan Ramazan sawǵası Aralboyı aymaǵında jasaytuǵın sociallıq qorǵawǵa hám járdemge mútáj 700 shańaraqqa qayırqomlıq sıpatında sawǵa etildi.
– Múbárek ramazan ayında bunday qayırqomlıq ilajları qala hám rayonlarda da dawam etpekte, – deydi «Vaqf» qayırqomlıq jámiyetlik fondı Qaraqalpaqstan filialınıń basshısı Islambek Tajetdinov. – Jaqın kúnlerde mayıplıǵı bolǵan, baǵıwshısın joyıtqan, kem támiyinlengen, sociallıq qorǵawǵa mútáj puqaralarǵa iftarlıq dasturxanın jayıw, qayırqomlıq ilajın ótkeriw rejelestirilgen.

Qaraqalpaqstan xabar agentligi