Suw resurslarınan nátiyjeli paydalanıwdı támiyinlew, tiyisli tarmaq hám tarawlarǵa suwdı únemleytuǵın texnologiyalardı engiziw, sondiy-aq, suwǵarılatuǵın jerlerdiń meliorativlik jaǵdayın jaqsılaw boyınsha sistemalı ilajlar ámelge asırılmaqta.

Tarawda alıp barılıp atırǵan reformalardıń nátiyjesinde ótken ásirdiń 90 – jıllarına salıstırǵanda suwdı jumsaw jılına 64 milliard metr kubtan házirgi kúnde ortasha 51 milliard metr kubqa shekem azaytıldı.
Biraq alıp barılıp atırǵan reformalar, jańa rawajlanıw strategiyasınıń qáliplestiriliwi hám soǵan sáykes túrde suw qatnasıqlarınıń sociallıq-ekonomikalıq tiykarları ózgertiliwi suwǵa baylanıslı nızam hújjetlerin qayta kórip shıǵıwdıń zárúrligin keltirip shıǵarmaqta.
Senattıń Agrar, suw xojalıǵı máseleleri hám ekologiya komitetiniń májilisinde sol haqqında sóz boldı. Usı maqsette islep shıǵılǵan «Ózbekstan Respublikasınıń Suw kodeksin tastıyıqlaw haqqında»ǵı nızam dodalandı.
Nızam menen endi suw qatnasıqları tarawındaǵı tiykarǵı huqıqıy hújjetler Suw kodeksinde sistemalastırılıp atırǵanı atap ótildi.
Nızamnıń qabıl etiliwi suwdan aqılǵa uǵras paydalanıw, onı nátiyjeli basqarıw hám qorǵaw jáne suw xojalıǵın uzaq múddetli rawajlandırıw ushın huqıqıy sharayatlar jaratadı. Sonday-aq, elimizdiń suw qáwipsizligine erisiledi. Tarawǵa investiciyalardı tartıw hám onı texnologiyalıq modernizaciyalaw xoshametlenedi.
Nızamnıń qabıl etiliwi xalıqaralıq suw huqıqı normaların milliy nızamshılıqqa sińdiriw hám Ózbekstannıń xalıqaralıq maydandaǵı imidjin jaqsılawǵa xızmet etedi.
Sonday-aq, májiliste «Haywanlardı identifikaciyalaw, dizimge alıw hám baqlaw haqqında»ǵı nızam da dodalandı. Bul nızamnıń maqseti haywanlardı identifikaciyalaw, dizimge alıw hám baqlaw tarawındaǵı qatnasıqlardı tártipke salıwdan ibarat

***
Xalıq deputatları jergilikli keńeslerdiń agrar, suw xojalıǵı hám ekologiya máseleleri boyınsha turaqlı komissiyalarınıń aǵzaları ushın oqıw-seminar da ótkerildi.
Seminarda turaqlı komissiyalardıń jumısın nátiyjeli shólkemlestiriw, olardıń tiykarǵı baǵdarları boyınsha anıq rejelerdi belgilew, wákillikli toparlarda áhmiyetli máselelerdi dodalaw hám anıq nátiyjelerge erisiw boyınsha tájiriybe almasıldı.
Jergilikli keńesler wákilleriniń nızamshılıqtaǵı jańalıqlar, ózgerisler boyınsha bilim hám kónlikpelerin arttırıp barıw, tarawǵa baylanıslı nızamlardı kórip shıǵıwda olardıń pikirlerin biliw zárúrligi aytıp ótildi.
Sonday-aq, eginlerdi suwǵarıwda suwdı únemleytuǵın texnologiyalardı engiziw hám tarawda jańa jumıs orınların jaratıw, qorshaǵan ortalıqtı qásterlep saqlaw, júzege kelip atırǵan mashqalalardı óz waqtında sheshiw boyınsha usınıslar islep shıǵıw sıyaqlı wazıypalar belgilep alındı.

N.Abduraimova,
ÓzA