Ózbekstan Prezidentiniń Franciyaǵa mámleketlik saparı qızǵın dawam etip atırǵan házirgi waqıtta usı mámleket penen kóplegen tarawlar qatarında, medicina baǵdarında da paydalı kelisimlerge erisilmekte.

Atap aytqanda, sapar aldında Parij qalasında bolıp ótken «Ózbekstan-Franciya» birinshi medicinalıq forumı sheńberinde Franciya densawlıqtı saqlaw ministri Yannik Noyder mámleketimizdiń densawlıqtı saqlaw ministri Asilbek Xudoyorov basshılıǵındaǵı delegaciyanı qabılladı. Bul haqqında DSM baspasóz xızmeti xabar berdi.
Sóylesiw dawamında eki tárepleme birge islesiw baylanısların jedel rawajlandırıw máseleleri dodalandı.
Maǵlıwmatlarǵa bola, Franciya densawlıqtı saqlaw sisteması xalıq salamatlıǵınıń joqarı dárejesi, medicinalıq xızmetlerden paydalanıw ańsatlıǵı, emleniw ushın gezekler joqlıǵı hám pútkil xalıq tájiriybeli medicinalıq xızmet penen qamtıp alınǵanlıǵı sıyaqlı normalar boyınsha JDSSh reytinginde joqarı orınlardı iyeleydi. Usı mánide, bul mámleket penen densawlıqtı saqlaw tarawında birge islesiw baylanısların bekkemlew paydalı bolıp esaplanadı.
Ministrler arasındaǵı ushırasıwdıń eń áhmiyetli bólegi eki tárepleme kelisiw deklaraciyasına qol qoyılıwı boldı.
Franciya densawlıqtı saqlaw ministri Yannik Noyderdiń atap ótkenindey, bul deklaraciya óz-ara birge islesiwdiń birinshi institucional basqıshı bolıp, maqsetlerdi anıq háreketlerge aylandıradı.
Bul hújjette medicinalıq qánigeler arasında tájiriybe almasıw, keselliklerdi erte basqıshta anıqlaw hám nátiyjeli emlewde joqarı texnologiyalıq sheshimler, jasalma intellekt imkaniyatlarınan paydalanıw sıyaqlı máseleler sáwlelengen.
Sonday-aq, delegaciyamız sapar sheńberinde Franciyanıń jetekshi densawlıqtı saqlaw mákemeleriniń jumısı menen jaqınnan tanıstı. Atap aytqanda, olar Parij qalası janındaǵı Syuren qalashasında jaylasqan kommerciyalıq emes oqıw emlewxanası – Fosh gospitalında boldı.
Bunnan tısqarı, wákillerimiz onkologiyalıq keselliklerdi emlewge qánigelestirilgen, óz baǵdarında Evropada jetekshi, dúnyadaǵı eń jaqsı medicinalıq mákemeler onlıǵına kiriwshi Gustav Russi institutınıń jumısı menen de jaqınnan tanıstı.

ÓzA