Ózbekstan Respublikası Prezidenti Shavkat Mirziyoev mámleketlik sapar menen Franciya Respublikasında bolmaqta.
12-mart kúni Parijdegi Veteranlar úyinde Ózbekstan Respublikası Prezidenti Shavkat Mirziyoevti rásmiy kútip alıw máresimi boldı.
Mámleketimiz jetekshisin Franciya Prezidenti Еmmanuel Makron kútip aldı.

Maydanda joqarı mártebeli miyman húrmetine Franciya gvardiyası, qurǵaqlıqtaǵı áskerler, áskeriy-teńiz hám áskeriy-hawa kúshleri xızmetkerlerinen ibarat húrmetli qarawıl sap tarttı.
Áskeriy orkestr atqarıwında eki mámleket gimnleri jańladı. Gvardiyashılar mámleketimiz basshısınıń aldınan saltanatlı júrip ótti.
Prezidentler húrmetli qarawıl sapınıń aldınan ótti hám rásmiy delegaciyalar aǵzaların qutlıqladı.
Soń mámleketimiz basshısı atlı gvardiyashılar hám motocikller menen birgelikte joqarı dárejede sóylesiw ótkeriw ushın Franciya Prezidentiniń rezidenciyası – Elisey sarayına jol aldı.
Elisey sarayında Ózbekstan Respublikası Prezidenti Shavkat Mirziyoev hám Franciya Respublikası Prezidenti Еmmanuel Makronnıń sóylesiwleri bolıp ótti.
Mámleket basshıları kóp táreplemeli Ózbekstan – Franciya qatnasıqların jáne de rawajlandırıw hám bekkemlew máselelerin júzbe-júz hám delegaciyalar qatnasıwında hár tárepleme dodaladı.
Eki mámleket jetekshileriniń 2023-jıl noyabr ayında Samarqand qalasında ótken ushırasıwı dawamında erisilgen kelisimler ámelge asırılıp atırǵanı qanaatlanıwshılıq penen atap ótildi.
Hár qıylı dárejelerde jedel sóylesiwler dawam etpekte. Ótken jılı tovar almasıw kólemi birinshi márte 1 milliard evrodan astı, birgeliktegi kárxanalardıń sanı 4 esege kóbeydi.
Elimizde Franciyanıń “Orano”, “EDF”, “Total”, “SUEZ”, “Voltalia”, “Veolia” hám kóplegen basqa jetekshi kompaniyaları tabıslı jumıs alıp barmaqta. Franciya rawajlanıw agentligi menen birge islesiw jańa sapaǵa iye boldı, onıń menen jańa Birge islesiw baǵdarlaması qabıl etilmekte.
Saparǵa tayarlıq sheńberinde Húkimetleraralıq komissiya májilisi hám “MEDEF” biznes missiyası nátiyjeli ótti, Isbilermenler palatası óz jumısın basladı.
Usı kúnlerde Parij, Tuluza, Lion hám Nicca qalalarında aymaqlardıń belsene qatnasıwında birgeliktegi ilajlar ótkerilmekte. Keshe birgeliktegi medicinalıq forum hám ilim hám bilimlendiriw boyınsha konferenciya, Ózbekstannıń turizm imkaniyatı hám mádeniyatına baǵıshlanǵan prezentaciyalar ótkerildi. Gretc-Armenvil qalasında ullı ilimpaz Ábiw Rayxan Beruniy byusti ashıldı.
Sawda-ekonomikalıq hám investiciyalıq-finanslıq tarawlardı óz-ara paydalı birge islesiwdi keńeytiw, Franciyanıń jetekshi kompaniyaları hám kárxanaları menen kooperaciyalıq joybarlardı ámelge asırıwǵa tiykarǵı itibar qaratıldı.
Bul retki sammitke jańa Innovaciya hám sanaat sherikliginiń baǵdarlaması tayarlanǵan. Áhmiyetli mineral shiyki zat resursların qazıp alıw hám qayta islew, energetika, infrastrukturanı rawajlandırıw, transport hám basqa da tarmaqlarda ulıwma bahası 6,5 milliard evrolıq birgeliktegi joybarlardı ámelge asırıw názerde tutılǵan.
Ulıwma, birgeliktegi joybarlar portfeli 12 milliard evrodan aslamdı quramaqta.
Usı mánide, finanslıq qollap-quwatlaw quralların keńeytiw zárúr ekenligi atap ótildi.
Mámleketimiz basshısı uzaq múddetli kooperaciyalıq baylanıslardı jolǵa qoyıwǵa járdemlesiw maqsetinde Ózbekstan – Franciya investiciyalıq keńesin shólkemlestiriw hám onıń birinshi májilisin bıyıl iyun ayında Tashkent investiciyalıq forum sheńberinde ótkeriwdi usınıs etti.
Aymaqlararalıq baylanıslardı qollap-quwatlaw maqsetinde kelesi jılı Samarqand qalasında eki mámleket aymaqlarınıń birinshi forumın ótkeriwge kelisip alındı.
Jetekshiler gumanitarlıq baǵdardaǵı ámeliy birge islesiwdi keńeytiwge ayrıqsha itibar qarattı. Parij qalasında Savickiy muzeyi toplamındaǵı avangard shıǵarmalar kórgizbesin shólkemlestiriw, mádeniy esteliklerdi saqlaw restavraciyalaw boyınsha birge islesiw ushın mámleketimizde Franciya miyrası institutınıń wákilxanasın ashıw rejeleri qollap-quwatlandı.
Usı jılı Tashkent qalasında Franciyadan tájiriybeli qánigelerdi tartqan halda Ózbekstan – Franciya universitetiniń ashılıwı bilimlendiriw tarawındaǵı tiykarǵı kelisim bolǵanı atap ótildi. Francuz tili oqıtıwshıların tayarlaw tarawında da nátiyjeli birge islesiw dawam ettiriledi.
Isbilermenlik, turizm hám mádeniy almasıwlardı jedellestiriw maqsetinde tárepler tikkeley aviaqatnawlar sanın kóbeytiw máselesin kórip shıǵadı.
Mámleket basshıları xalıqaralıq hám regionallıq áhmiyetke iye áhmiyetli máseleler boyınsha da pikir almastı. Kóp tárepleme shólkemler sheńberinde bir-birin qollap-quwatlawdı dawam ettiriw, terrorizm, ekstremizm, radikalizm, kiberjınayatshılıq hám qáwipsizlikke qáwip salıp atırǵan basqa zamanagóy qáwip-qáterlerge qarsı gúresiwde háreketlerdi birlestiriw áhmiyetli ekeni atap ótildi.
Sistemalı sóylesiwdi jolǵa qoyıw hám muwapıqlastırıw maqsetinde sırtqı isler ministrlikleriniń basshılıǵında ekonomikalıq uyımlardı tartqan halda Strategiyalıq rejelestiriw toparın dúziwge kelisip alındı.
Sóylesiwler sońında mámleket basshıları eki mámleket arasında strategiyalıq sheriklik qatnasıqların ornatıw haqqında tariyxıy sheshimge keldi.
Ushırasıw sońında Prezident Shavkat Mirziyoev Prezident Еmmanuel Makrondı ózi ushın qolaylı waqıtta juwap sapar menen Ózbekstanǵa keliwge mirát etti.
Parij qalasında bolıp ótken sóylesiwler juwmaǵında Ózbekstan Respublikası Prezidenti Shavkat Mirziyoev hám Franciya Respublikası Prezidenti Еmmanuel Makron Strategiyalıq sheriklik ornatıw haqqındaǵı birgeliktegi deklaraciyanı qabılladı.
Mámleket basshıları janında Qánigeler hám studentler háreketsheńligi haqqındaǵı húkimetleraralıq kelisim, Diplomatiyalıq pasport iyelerin viza talaplarınan óz-ara azat etiw haqqındaǵı húkimetleraralıq kelisim hám Franciyanıń jetekshi kompaniyaları menen Ózbekstanda 6,5 milliard evrolıq perspektivalı kooperaciyalıq joybarlardı ámelge asırıwdı názerde tutıwshı Investiciyalıq hám innovaciyalıq tarawlardaǵı birge islesiw baǵdarlaması alısıldı.
Mámleketlik sapar dawamında tómendegilerge de qol qoyıldı:
– Ózbekstan – Franciya universitetin shólkemlestiriw haqqında húkimetleraralıq kelisim;
– Readmissiya haqqında húkimetleraralıq kelisim;
– Sırtqı isler ministrlikleriniń 2025-2026-jıllarǵa mólsherlengen birge islesiw baǵdarlaması;
– 2026-2030-jılları Franciya rawajlanıw agentligi menen birge islesiw baǵdarlaması;
– Xalıqaralıq shólkemler sheńberindegi birge islesiw haqqında deklaraciya;
– Densawlıqtı saqlaw tarawında birge islesiw haqqında deklaraciya;
– Francuz tilin oqıtıwdı keńeytiw haqqında bildiriw;
– Muzıka, kino hám teatr tarawlarında birge islesiw haqqında deklaraciya;
– Mádeniyat hám kórkem ónerdi rawajlandırıw qorı menen Franciya Mádeniyat ministrligi, Mádeniy miyras milliy institutı hám Oraylıq Aziya izertlewleri institutı arasındaǵı birge islesiw kelisimleri;
– Tashkent hám Parij qalaları arasında sheriklik qatnasıqların ornatıw haqqındaǵı bildiriw hám basqa da eki tárepleme hújjetler.
Elisey sarayındaǵı joqarı dárejedegi ushırasıw waqtında Prezident Shavkat Mirziyoev Prezident Еmmanuel Makronǵa ullı francuz jazıwshısı Viktor Gyugonıń ózbek tiline awdarılǵan «Kúlimsiregen adam» romanınıń birinshi nusqasın sawǵa etti.
Bul kitaptıń ǵalaba baspadan shıǵıwı hám tez arada kitapqumarlardıń itibarına usınılıwı kútilmekte.
Bunnan soń Ózbekstan Respublikası Prezidenti Shavkat Mirziyoev Franciya isbilermen toparlarınıń jetekshi wákilleri menen ushırasıw ótkerdi.
Mámleketimiz basshısı 2018 hám 2022-jılları usı mámleketke rásmiy saparları hám 2023-jılǵa Samarqand sammiti de Franciya isbilermenleri menen ushırasqan edi.
Forum áne, usı ashıq hám konstruktiv sóylesiwdiń dawamı boldı. Bul retki ushırasıw onda Ózbekstannıń jeke menshik kompaniyaları basshıları hám wákilleri de qatnasqanı menen ajıralıp turadı.
Ilajda Franciyanıń sırtqı sawda hám sırt eldegi francuz puqaraları isleri boyınsha ministr-delegatı Loran Sen-Marten, Franciya rawajlanıw agentliginiń bas direktorı Remi Riu, “MEDEF International” basshısı – “Orano Mining” kompaniyasınıń basqarıwshı baslıǵı Klod Imoven, sonday-aq, eki mámleket jetekshi kompaniyaları, investiciya hám bank-finans institutlarınıń 60 dan artıq basshıları hám wákilleri qatnastı.
Franciya biznesi tárepinen SUEZ, Veolia, Total, EDF, Voltalia, Orano, Meridiam, Saint-Gobain, Imerys, Natixis, Societe Generale, BPI France, Airbus, MND, Eiffage, Schneider Electric, Total Energies, Alstom, Technip Energies, Egis, ADP Group, Ellipse Projects, Assystem, ATR hám basqa kompaniyalar qatnastı.
Mámleketimiz basshısı óziniń shıǵıp sóylegen sózinde Franciya Prezidenti Еmmanuel Makron menen ótken nátiyjeli sóylesiwlerdi joqarı bahalap, isbilermenlik baslamaların qollap-quwatlaw hám birgeliktegi kooperaciyalıq joybarlardı ámelge asırıwǵa ayrıqsha itibar qaratılǵanın atap ótti.
Ushırasıwdıń tiykarǵı nátiyjesi sıpatında Ózbekstan – Franciya qatnasıqların strategiyalıq sheriklik dárejesine kóteriw haqqında tariyxıy qarar qabıl etildi.
Kóp táreplemeli birge islesiwdi keńeytiwde eki mámleket jetekshi kompaniyaları áhmiyetli orın iyelep atırǵanı atap ótildi.
Franciya isbilermen toparlarınıń wákillerine Jańa Ózbekstandaǵı izge qaytpaytuǵın ekonomikalıq reformalar strategiyasın qollap-quwatlap atırǵanı ushın minnetdarshılıq bildirildi.
Bıyıl yanvar ayında “MEDEF” quramındaǵı iri kompaniyalar basshılarınıń Tashkent qalasında saparınıń nátiyjeleri joqarı bahalandı.
Franciya kompaniyaları menen mámleketimiz ekonomikasınıń strategiyalıq tarmaqlarında bir qatar birgeliktegi joybarlar ámelge asırılıp atırǵanı qanaatlanıwshılıq penen atap ótildi.
Bul mámleket investiciyaların jedel tartıw hám aldıńǵı texnologiyalardı engiziw, Franciya kárxanalarınıń sheshimleri, toplanǵan úlken tájiriybe hám bilimlerin qollanıwdan Ózbekstan mápdar.
Ózbekstan Prezidenti Franciya menen sawda-ekonomikalıq baylanıslardı jáne de keńeytiw zárúr ekenligin atap ótti.
Franciya kompaniyaları menen 2027-jılǵa shekemgi dáwirge mólsherlengen innovaciyalıq hám sannat kooperaciyası baǵdarlaması oǵan xızmet etedi. Oǵan ulıwma bahası 6,5 milliard evro bolǵan anıq baǵdar hám joybarlar kirgizilgen.
Baǵdarlamanı ámelge asırıw sheńberinde Franciyanıń jetekshi bank hám finans shólkemlerin belsene tartqan halda biznes baslamaların qarjılay qollap-quwatlawdıń nátiyjeli qurallarınıń keńnen engiziliwi názerde tutılǵan.
Mámleketimiz basshısı áhmiyetli mineral resurslardıń perspektivalı kánlerin ózlestiriw hám olardı tereń qayta islew, qurılıs materialları, ximiya hám farmacevtika tarmaqları, elektrotexnika sanaatı, awıl xojalıǵında zamanagóy óndirislerdi shólkemlestiriw hám basqalardı Ózbekstan – Franciya isbilermenlik birge islesiwin jáne de rawajlandırıwdıń perspektivalı baǵdarları sıpatında kórsetip ótti.
Еnergetikada energiya islep shıǵarıw hám saqlaw quwatlıqların keńeytiw, Ózbekstan aymaqlarında suw xojalıǵı, kommunallıq, turizm, transport infrastrukturasın modernizaciyalaw birge islesiwdi rawajlandırıwda úlken imkaniyatqa iye.
– Eki mámleket kompaniyaları qatnasıwındaǵı joybarlardı qollap-quwatlaw hám jedellestiriw maqsetinde turaqlı jumıs alıp baratuǵın Ózbekstan – Franciya investiciyalıq keńesin shólkemlestiriwdi usınıs etemen. Biz tárepten oǵan Ózbekstan Bas ministri basshılıq etedi. Birinshi ushırasıwdı iyun ayında Tashkent xalıqaralıq investiciyalıq forum sheńberinde ótkeriwimiz múmkin. Hámmeńizdi shólkemlestirilip atırǵan keńestiń tolıq huqıqlı aǵzası sıpatında bolajaq ilajda belsene qatnasıwǵa mirát etemen,-dedi mámleketimiz basshısı.
Óz gezeginde, Franciya isbilermen toparlarınıń wákilleri birge islesiwdi keńeytiw boyınsha anıq usınıs hám rejelerin bildirdi.
Mámleketimiz basshısı isbilermen toparlardıń wákillerine tabıslar tilep, tiyisli ministrlikler hám uyımlardıń basshılarına Ózbekstan Húkimeti tárepinen taslıyıqlanǵan «jol kartaları» tiykarında erisilgen kelisimlerdiń orınlanıwı ústinen qadaǵalawdı támiyinlew boyınsha tapsırmalar berdi.
Sapar sheńberinde Parij qalasında Ózbekstan Respublikası Prezidenti Shavkat Mirziyoevti Franciya Respublikasınıń joqarı sıylıǵı – Húrmetli legion ordeni menen sıylıqlaw máresimi bolıp ótti.
Joqarı sıylıqtı mámleketimiz basshısına Franciya Prezidenti Еmmanuel Makron saltanatlı túrde tapsırdı.
Ózbekstan Prezidenti eki mámleket birge islesiwin rawajlandırıw, xalıqlarımız arasındaǵı doslıq hám óz-ara túsinisiwdi bekkemlewge qosqan úlken úlesi ushın usı ordenge eristi.
Mámleketimiz jetekshisi sıylıq ushın Franciya basshısına shın kewilden minnetdarshılıq bildirip, keyingi jılları ónimli birge islesiwde joqarı nátiyjelerge erisilgeni, eki mámleket qatnasıqları strategiyalıq sheriklik dárejesine kóterilgenin qanaatlanıwshılıq penen atap ótti.
Húrmetli legion ordeni 1802-jılı shólkemlestirilgen. Franciyada bul orden ayrıqsha xızmetlerdiń mámleketlik dárejede tán alınıwı hám dańqtıń eń joqarı belgisi bolıp esaplanadı.
Franciya Prezidenti Еmmanuel Makron Elisey sarayında Ózbekstan Respublikası Prezidenti Shavkat Mirziyoevtiń húrmetine mámleketlik qabıllaw máresimin shólkemlestirdi.
Qabıllawda Ózbekstan hám Franciya rásmiy delegaciyalar aǵzaları, belgili mádeniyat, kórkem óner hám ilim ǵayratkerleri, isbilermen toparlar hám jámiyetshilik wákilleri qatnastı.
Mámleketimiz basshısı Еmmanuel Makron hám onıń ómirlik joldası Brijit Makronǵa shın kewilden qabıllaǵanı ushın minnetdarshılıq bildirip, búgin bolıp ótken sóylesiwler tariyxıy áhmiyetke iye ekenin, olardıń nátiyjesinde ellerimiz arasındaǵı qatnasıqları strategiyalıq sheriklik dárejesine kóterilgenin qanaatlanıwshılıq penen atap ótti.
Franciya jetekshisi búgin ótkerilgen sóylesiwlerdiń nátiyjelerin hám qol qoyılǵan kelisimlerdi qollap-quwatladı.
– Bir neshe jıl ishinde biz energetika, suw resursların basqarıw, kommunallıq xızmetler, transport, turaqlı turizm sıyaqlı áhmiyetli tarawlarda uzaq múddetli birge islesiw baylanısların ornatıwǵa eristik. Onıń dáliyli sıpatında Franciya húkimeti hám Franciya rawajlanıw agentligi járdeminde francuz kompaniyaları Ózbekstanǵa investiciya kirgizip atırǵanı, aymaqlarda qosımsha qun hám jumıs orınlarınıń jaratılıp atırǵanı, jaslar kásip úyreniw, turmısta óz ornın tawıp atırǵanın keltiriw múmkin,-dedi Еmmanuel Makron.
Tárepler xalıqlarımızdıń abadanlıǵı jolında Ózbekstan – Franciya birge islesiwin jáne de bekkemlewge isenimli umtılatuǵının bildirdi.
Ózbekstan Respublikası Prezidenti Shavkat Mirziyoev Franciyaǵa mámleketlik saparı sheńberinde BMShtıń Bilimlendiriw, ilim hám mádeniyat máseleleri boyınsha shólkemi (YuNESKO) bas direktorı Odri Azuleni qabılladı.
BMSh sistemasındaǵı bul abıraylı struktura menen nátiyjeli birge islesiwdi jáne de rawajlandırıw máseleleri, sonday-aq, usı jıldıń gúzinde Samarqand qalasında shólkem Bas konferenciyasınıń 43-sessiyasına tayarlıq kóriw hám onı ótkeriwdiń ámeliy jaqları dodalandı.
Kóp táreplemeli sheriklik búgingi kúnde joqarı dárejede ekeni qanaatlanıwshılıq penen atap ótildi.
Ózbekstannıń baslaması menen málimlemeden paydalanıw hám balalar bilimlendiriwi máseleleri boyınsha rezolyuciyalar qabıllandı.
Mámleketimiz Mádeniy baylıqlardı saqlaw hám restavraciyalaw boyınsha xalıqaralıq orayǵa aǵza boldı. Buxara «Kreativ qalalar tarmaǵı»na qosıldı. Samarqandtaǵı Jipek jolı universitetinde YuNESKO kafedrası ashıldı. Ótken jılı bilimlendiriw, mádeniyat, sanlı hám innovaciyalıq texnologiyalar tarawlarında 7 jańa joybardı ámelge asırıw baslandı.
Turan shólleri hám Zarafshan-Qaraqum koridorı, pilleshilik, gúlalshılıq, rubab shertiw hám iftarlıq dástúrleri, «Buxara ámiri diywanxanasınıń arxivi», «Túrkstan albomı», «Xudaybergen Devonov fotoalbomı» YuNESKOnıń arnawlı dizimlerine kirgizildi.
Samarqand qalasında bolajaq Bas konferenciyanıń 43-sessiyası sońǵı 40 jıl ishinde birinshi márte YuNESKOnıń Parij qalasındaǵı rezidenciyasınan basqa orında ótkeriledi. Bul waqıya shólkemniń 80 jıllıǵına tuwra keletuǵının atap ótiw kerek.
Bas direktor Odri Azule Ózbekstan menen nátiyjeli birge islesiwdi joqarı bahalap, bolajaq ilajǵa keń kólemli tayarlıq kórilip atırǵanı ushın mámleketimiz basshısına minnetdarshılıq bildirdi.
Ámeliy birge islesiw baǵdarlamaların jáne de keńeytiw, sonday-aq, YuNESKO Bas konferenciyasınıń 43-sessiyası sheńberindegi forum hám ilajlardı shólkemlestiriw boyınsha tıǵız birge islesiwdi dawam ettiriwge kelisip alındı.
Ózbekstan Respublikası Prezidenti Shavkat Mirziyoevtiń Franciyaǵa mámleketlik saparı dawam etpekte.

ÓzA