Xalıqtı qıynap kiyatırǵan huqıqıy mashqalalarǵa sheshim tabıw maqsetinde, Ózbekstan Respublikası Ádillik ministri Akbar Toshqulovtıń Shımbay rayonında kóshpeli qabıllawı ótkerildi.

Ilajǵa rayon hákimi Aybek Tajetdinov, aymaqtaǵı mámleketlik mákeme, shólkem hám keń jámiyetshilik wákilleri qatnastı.
Kóshpeli qabıllawda puqaralardıń miynet tarawındaǵı tartıslar, kadastr, shaxsın tastıyıqlawshı hújjetlerin rásmiylestiriw, bántlik, sociallıq qorǵaw hám basqa da bir qatar máseleler boyınsha múrájatlar qabıllandı.
-Múrájatlardıń segizi óz ornıda sheshilip, 14 puqarınıń múrájatın úyrenip shıǵıw ushın is júrgiziwge alındı. Sonday-aq, qabıllaw dawamında 20 dan aslam kóshpeli mámleketlik xızmetler kórsetildi,-deydi Qaraqalpaqstan Respublikasi Ádillik ministrliginiń qánigesi Nuriya Berdiniyazova.
Sonday-aq, Ádillik ministri Akbar Toshkulov Shımbay rayonı ádillik bólimi jumısı menen tanısıp, mámleketlik xızmetler orayında aymaq xalqı ushın jaratılǵan qolaylı sharayatlar, kishi kitapxana, Wi-Fi aymaq, ózi-ózine xızmet kórsetiw múyeshleri óz jumısın kózden ótkerdi.
Ilajda ministr taraw xızmetkerleri menen sáwbetlesip, xalıqtıń kúndelikli turmısında ushırasatuǵın huqıqıy mashqalalardı anıqlaw hám onlayn máhálle platforması arqalı kelip túsken huqıqıy mashqalalardı saplastırıw, bul boyınsha «máhálle jetiligi» menen turaqlı birge islesiw zárúrligi atap ótildi.
Usılar menen bir qatar, ushırasıwda mámleketlik hám huqıqıy xızmetler sapasın bunnan bılayda arttırıw boyınsha xızmetkerlerdiń usınısları tıńlanıp, kerekli másláhát hám kórsetpeler berildi.

Adilbay Orazov,
Qaraqalpaqstan xabar agentligi sholıwshısı.