Insan huqıqların támiyinlewdiń siyasiy, ekonomikalıq hám sociallıq kepilliklerin kúsheytiwge jáne bul taraw menen baylanıslı ámeldegi mexanizmlerdi bunnan bılay da jetilistiriwge qaratılǵan kompleksli ilajlar ámelge asırılmaqta. Bul reformalarǵa únles tárizde Ombudsman institutınıń jumıs baǵdarları da jetilisip barmaqta.

Ombudsman elimizdegi hár bir insan óziniń qorǵalǵanın seziniwi, olardıń huqıqları kepilleniwin támiyinlewge umtılmaqta.
Ózbekstan Respublikası Oliy Majlis Senatınıń Agrar, suw xojalıǵı máseleleri hám ekologiya komiteti jáne Jaslar, hayal-qızlar, mádeniyat hám sport máseleleri komitetleriniń qospa májilisinde parlamenttiń Insan huqıqları boyınsha wákili (Ombudsman)niń 2024-jılǵı jumısı haqqındaǵı bayanatı tıńlandı.
Atap ótilgenindey, 2024-jılı Ombudsmanǵa kelip túsken múrájatlar 23 mıń 422 ni quradı. Onıń 6,5 mıńı sociallıq huqıqlar, 6 mıńnan aslamı ekonomikalıq huqıqlar, 3 mıń 392 si jeke huqıq hám erkinlikler, 3 mıńǵa shamalası múrájat etiw huqıqı jáne siyasiy huqıqlar, 282 si ekologiyalıq huqıqlar jáne 1,5 mıńǵa shamalası basqa da máselelerge tiyisli bolǵan.
Atap ótilgenindey, búgingi kúnde ekologiya hám qorshaǵan ortalıqtı qorǵaw jáne tábiyǵıy resurslardan aqılǵa muwapıq hám nátiyjeli paydalanıw mámleketlik siyasattıń áhmiyetli baǵdarlarınan birine aylandı.
2024-jılı ekologiyalıq huqıqlar baǵdarınan kelip túsken 282 múrájattıń 51 i qadaǵalawǵa alınıp, wákillikli mámleketlik uyımlarǵa Ombudsmannıń sorawı kirgizilgen. 118 i tiyisli mámleketlik uyımlarǵa kórip shıǵıwǵa jiberilgen hám 19 ı boyınsha túsinikler berilgen. Qadaǵalawǵa alınǵan múrájatlardıń 72,5 procenti unamlı sheshiliwine erisilgen.
Úyreniwler dawamında Shayxontahur rayonı «Taxtapul» mákan puqaralar jıyınındaǵı nızamsız qurılıs jumıslarınıń toqtatılıwına erisilgen. Eki jaǵdayda óz basımshalıq penen qurılǵan imaratlardı buzdırıw boyınsha sudqa dawa arza kirgizilgen. Sonday-aq, taza qorshaǵan ortalıqqa bolǵan huqıqlar máselesinde 54, taza ishimlik suwı menen támiyinlew máselesinde 17, sanitariya-epidemiologiyalıq máselede 12 múrájat kelip túsken.
Múrájatlar boyınsha Ombudsmannıń jibergen sorawları nátiyjesinde Ferǵana wálayatı Altarıq rayonında 50 gektar jer maydanda jaylasqan 19 jıllıq terekler kesiliwiniń aldı alınǵan. Tashkent wálayatı Shınaz rayonı «Bunyodkor» mákan puqaralar jıyınındaǵı qubırlardıń tazalanıwı támiyinlengen.
Sonıń menen birge, hayal-qızlar hám balalardıń huqıqların támiyinlewge qartılǵan bir qatar ilajlar kórildi.
Hayal-qızlardan perzentleri támiynatı ushın aliment hám qarjılay járdem alıw boyınsha 298 múrájat qadaǵalawǵa alınıp, olardıń 197 si (66,1 procenti) unamlı sheshildi, 5 jas óspirim balanıń mektepke qabıl etiliwine járdem berildi.
Májilis juwmaǵında qaralǵan másele boyınsha komitetlerdiń tiyisli qararı qabıl etildi.

N.ABDURAIMOVA,
ÓzA nıń xabarshısı