Ózbekstan Respublikası Prezidentiniń 2025-jıl 21-fevraldaǵı “2025-jılǵı Nawrız ulıwmaxalıqlıq bayramına tayarlıq kóriw hám onı ótkeriw haqqında”ǵı qararına muwapıq, orınlarda bayramǵa tayarlıq kóriw jumısları hám «Jasıl mákan» joybarı sheńberindegi ilajlar kóterińkilik ruwxta baslanıp ketti. Shomanay rayonında da Nawrız bayramı hám “Jasıl mákan” joybarına baǵıshlanǵan ulıwma milliy shembilikke tayarlıq kórilmekte.

Rayonda “Jasıl mákan” ulıwma milliy joybarında belgilengen ilajlardı ámelge asırıw, bayram aldınan rayonnıń barlıq awıl, kóshe, máhállelerinde abadanlastırıw hám kóklemzarlastırıw jumıslarına qaratılǵan ulıwma milliy shembilik ótkeriw boyınsha shtab májilisi ótkerildi.
Májiliste rayon hákimi, orınbasarları, kárxana, mákeme, shólkem xızmetkerleri hám máhálle baslıqları qatnasıp, rejelestirilgen jumıslardı nátiyjeli shólkemlestiriw boyınsha aymaqlar kesiminde tapsırmalar berildi.
Atap ótilgenindey, 2025-jılǵı Nawrız ulıwmaxalıqlıq bayramı elimizde “Qádiriyatlarıń máńgi bolsın, Nawrız!” degen iygilikli ideya tiykarında ulıwma xalıqlıq seyilleri túrinde joqarı dárejede keńnen belgilenedi.
Bayram ilajlarında xalıqtıń sociallıq qorǵalıwın támiyinlewge, mútáj qatlamlardı qollap-quwatlawǵa, jámiyettiń hesh bir aǵzasın mehir hám itibardan shette qaldırmawǵa, máhállelerdi abadanlastırıwǵa úlken itibar qaratıladı. “Qorshaǵan ortalıqtı qorǵaw hám “jasıl ekonomika” jılı”nda belgilenetuǵın bıyılǵı Nawrız bayramınıń kóp milletli jámiyetimizde tınıshlıq, doslıq hám awızbirshilik ortalıǵın bekkemlewdegi ornı ayrıqsha.
Haqıyqatında da, jańalanıw hám jasarıw máwsiminde tazalıq hám abadanlastırıwǵa ayrıqsha itibar qaratılsa, abat máhállede, abat kóshe hám shańaraqta ótkerilgen Nawrız bayramınıń keypiyatı ózgeshe boladı.
Házirgi waqıtta orınlarda abadanlastırıw jumısları baslanıp ketti.

Á.Jiyemuratov,
Qaraqalpaqstan xabar agentligi.