Bıyıl 12-18-mart kúnleri Evropa Awqamı Xalıqaralıq birge islesiw boyınsha komissarı Yozef Sikela Oraylıq Aziyanıń bes mámleketi boylap sapar etedi. Bul haqqında EAnıń Ózbekstandaǵı wákilxanasınıń málimleme xızmeti xabar berdi.

Málim etiliwinshe, bul sapar etiw arqalı EA hám region mámleketleri birge islesiwin bekkemlew, jańa jumıs orınların jaratıw, turaqlı ekonomikalıq ósiwdi qollap-quwatlawǵa qaratılǵan «Global dárwaza» (Global Gateway) strategiyasın keńeytiw maqset etilgen.
Komissar Sikela Oraylıq Aziya Evropa Awqamınıń áhmiyetli sherigi ekenin atap ótip, óz-ara qatnasıqlarda úlken imkaniyat bar ekenligin bildirdi. Onıń sózlerine bola, global mashqalalar bekkem sheriklik zárúr ekenligin jáne bir márte tastıyıqlamaqta, EA regionda ámelge asırılıp atırǵan joybarlardı qollap-quwatlaw hám rawajlandırıwǵa umtılmaqta.
Sapar dawamında transport, áhmiyetli shiyki zat, sanlı baylanıs, suw hám energetika baǵdarlarındaǵı ulıwmalıq háreketler dodalanadı. Sonıń ishinde, Transkaspiy transport koridorın jetilistiriw, tábiyǵıy resurslardan nátiyjeli paydalanıw, jańa jumıs orınların jaratıw, internet tezligin arttırıw, ekologiyalıq taza hám arzan energiya dereklerin keńeytiw boyınsha bir qatar kelisimlerge qol qoyılıwı rejelestirilgen.
Mırza Sikelanıń regionımız boylap saparı Ózbekstanda juwmaqlanadı. Komissar elimizde húkimet hám biznes wákilleri menen ushırasıp, Almalıq kán-metallurgiya kombinatına baradı. Sonday-aq, sanlı infrastrukturaǵa baylanıslı kelisimlerge qol qoyılıwı da kútilmekte.
EAnıń «Team Europe» principine tiykarlanǵan bul sapar etiw dawamında Evropa qarjı institutları – Investiciya hám Tikleniw hám rawajlanıw banki, jeke menshik sektor wákilleri qatnasadı.
Bizge belgili, aprel ayında Evropa Awqamı – Oraylıq Aziya sammiti, iyunda bolsa «Global Gateway» forumı ótkeriledi. Usı sapar etiw procesinde dodalanǵan joybarlar ámeliyatqa qollanılıwı da kútilmekte.
«Global dárwaza» EAnıń sanlı, energetika hám transport tarawlarında aqıllı, ekologiyalıq taza hám qáwipsiz baylanıslardı rawajlandırıwǵa qaratılǵan strategiyası bolıp, densawlıqtı saqlaw, bilimlendiriw, ilimiy izertlew sistemaların bekkemlewge úles qosadı.

N.Ziyodullaeva tayarladı.
ÓzA