Qarar hám onıń orınlanıwı

Prezidentimizdiń 2024-jıl 30-dekabrdegi “Awıl xojalıǵı maydanlarındaǵı qosımsha imkaniyatlardan paydalanǵan halda ónim jetistiriwdi kóbeytiwge baylanıslı ilajlar haqqında”ǵı qararı tiykarında atız shetlerine, kanallar, kollektor-drenaj tarmaqları átirapındaǵı maydanlarǵa eksportqa qolaylı eginlerdi egiw áhmiyetli wazıypa etip belgilendi.
Sonday-aq, xalıqqa tiyisli qıytaq jerlerde, xojalıqlardıń hám kóp qabatlı turaq jaylardıń aldılarında, máhállelerdiń ishki kóshelerinde awıl xojalıǵı ónimlerin jetistiriwdi nátiyjeli shólkemlestiriw hám kóbeytiw arqalı mámlekettiń eksport kórsetkishlerin arttırıw maqsetinde wazıypalar da belgilendi.
Awıl xojalıǵı ónimlerin jetistiriwdi shólkemlestiriw boyınsha Ósimlikler karantini hám qorǵaw agentligine atız shetlerinde hám xalıqqa tiyisli qıytaq jerlerinde, xojalıqlar hám kóp qabatlı turaq jaylardıń aldı, máhálleniń ishki kóshelerinde ónim jetistiriw, awıl xojalıǵı subyektlerine tuqım hám nállerdi jetkeriw, jetistirilgen ónimlerdi eksportqa baǵdarlawdı shólkemlestiriw wazıypası júklendi.
Bul qarardan kelip shıqqan usı hám basqa da wazıypalardı, sonday-aq, «Kámbaǵallıqtan abadanlıqqa qaray» baǵdarlamasınıń orınlanıwın támiyinlew maqsetinde jumısshı topar baslıǵı – Ózbekstan Respublikası Ósimlikler karantini hám qorǵaw agentliginiń direktorı I.Еrgashevtiń basshılıǵında Xojeli rayonındaǵı Samankól, Qumjıqqın, Ámiwdárya hám Kún nurı máhálleleriniń turǵınları ushın kórgizbeli seminar shólkemlestirildi.
Seminarǵa rayon hákimi J.Ermashev, tiyisli tarawlar qánigeleri, máhálle jetiligi wákilleri hám aymaq turǵınları qatnastı.
Sózge shıqqanlar “Bir máhálle – bir ónim” principi tiykarında eksportqa qolaylı awıl xojalıǵı ónimlerin jetistiriw, saqlaw, keptiriw, ıssıxanalardan nátiyjeli paydalanıw hám sol arqalı xalıqtıń dáramatların arttırıw zárúr ekenligin atap ótti.
Bul jumıslardı baslap jiberiw maqsetinde biriktirilgen wákil I.Еrgashev tárepinen aymaq turǵınlarına jaqınnan járdem kórsetiw maqsetinde, máwsim dawamında jámi 100 mıń túp shiye nállerin jetkerip beriw rejelestirilgen bolıp, usı kúnniń ózinde 10 mıń túp shiye nálleri, bel, ketpen, shelek hám basqa da miynet quralları biypul tarqatıldı.
Bunnan soń nállerdi durıs egiw hám tárbiyalaw boyınsha kɵrgizbeli seminar ótkerilip, usılları túsindirilip, aymaq turǵınlarınıń qatnasıwında jaqsı niyet penen náller otırǵızıldı.

Á.Jiyemuratov,
Qaraqalpaqstan xabar agentligi