Ózbekstan «Adolat» social-demokratiyalıq partiyası hám onıń Oliy Majlis Nızamshılıq palatasındaǵı frakciyasınıń birgeliktegi májilisi bolıp ótti.

Onda usı jıl 5-mart kúni Ózbekstan Respublikası Prezidenti basshılıǵında ótkerilgen Korrupciyaǵa qarsı gúresiw boyınsha milliy keńesiniń keńeytilgen májilisinde belgilengen áhmiyetli wazıypalar hám baslamalardan kelip shıǵıp, partiya hám onıń frakciyası aldında turǵan tiykarǵı wazıypalar dodalandı.
– Elimizde korrupciya illetine qarsı gúresiw, onıń hár qanday kórinisine shek qoyıw máselesi ulıwmamilliy háreket dárejesine kóterildi, – dedi partiya Siyasiy Keńesiniń baslıǵı Robaxon Mahmudova. – Korrupciyaǵa qarsı gúresiw boyınsha bir qatar nızamlar qabıl etildi, parlament hám húkimet dárejesinde óz aldına strukturalar shólkemlestirildi. Sonıń menen birge, byurokratiyanıń aldın alıw, ashıq-aydınlıqtı támiyinlew, mámleketlik xızmetlerde elektron sistemalardı engiziw arqalı korrupciyallıq faktorlardı saplastırıw jolında salmaqlı jumıslar ámelge asırılmaqta.
Mámleketimiz basshısınıń bayanatında tarawdaǵı kemshilikler atap ótilip, anıq hám áhmiyetli wazıypalar belgilep berildi. Bul wazıypalar bolsa partiya hám frakciya ushın qollanba bolıp xızmet etedi. Partiya shólkemlerimiz hám deputatlıq birlespelerimiz korrupciya illetine qarsı gúresiwde jámiyetlik hám deputatlıq qadaǵalawdı basqıshpa-basqısh ámelge asırıwı, taraw hám tarmaqlardıń ishine kirip barıwı kerek, – dedi frakciya basshısı.
Májiliste shıǵıp sóylegenler korrupciya barlıq tarawdaǵı reformalardıń nátiyjesine unamsız tásir etetuǵının, mámlekettiń hám jámiyettiń rawajlanıwına tosıq bolatuǵının ayrıqsha atap ótti. Sonlıqtan da oǵan qarsı keskin qatnastı qáliplestiriw úlken áhmiyetke iye ekeni atap ótilip, bir qatar usınıslar bildirildi.
Partiyanıń bul baǵdardaǵı jumısın bunnan bılay da jedellestiriw zárúrligi atap ótildi. Usı múnásibet penen partiya basshılıǵı usı jıldıń aprel ayın «Korrupciyaǵa qarsı gúresiw aylıǵı» dep járiyalawdı usınıs etti. Usı aylıq sheńberinde partiyanıń baslaması menen nızam dóretiwshiliginde korrupciyaǵa baylanıslı jınayatlar ushın jazanı kúsheytiw, jámiyetshiliktiń qatnasıwın keńeytiw, mápler soqlıǵısıwınıń aldın alıw hám adam faktorın qısqartıwǵa qaratılǵan ilajlar ámelge asırılıwı zárúrligi atap ótildi.
Májilis dawamında partiya Saylaw aldı baǵdarlamasında názerde tutılǵan densawlıqtı saqlaw sistemasında «Aqıllı medicina» sistemasınıń huqıqıy tiykarların jaratıw, «Еlektron poliklinika» hám basqa da sanlı platformalardı engiziw, tarawdı «korrupciyadan jıraq» tarawǵa aylandırıw, farmacevtika tarawı xızmetkerleri hám medicina qánigeleri arasındaǵı jasırın kelisimler hám nızamsız sóylesiwlerdiń aldın alıw sıyaqlı jumıslardı ámelge asırıw zárúrligine itibar qaratıldı.
Koorupciyanıń aldın alıw hám oǵan qarsı gúresiwde mámleketlik hám mámleketlik emes shólkemler hám jámiytshilik penen tıǵız hám nátiyjeli birge islesiw ayrıqsha áhmiyetke iye ekeni aytıp ótildi. Usı múnásibet penen ilaj dawamında Ózbekstan «Adolat» social-demokratiyalıq partiyası hám Korrupciyaǵa qarsı gúresiw agentligi arasındaǵı birge islesiwdi jańa basqıshqa alıp shıǵıwǵa qaratılǵan memorandumǵa qol qoyıldı.
Májilis juwmaǵında ortaǵa taslanǵan usınıslardan kelip shıǵıp, tiykarǵı wazıypalar belgilep alınıp, tiyisli qarar qabıl etildi.

Muhtarama KOMILOVA,

ÓzAnıń xabarshısı