Búgin Tashkenttegi «Ózekspooray» oraylıq kórgizbeler kompleksinde «AgroWorld Uzbekistan-2025» jigirmalanshı xalıqaralıq kórgizbesi ashıldı.

«Iteca Exhibitions» xalıqaralıq kórgizbe kompaniyası hám onıń sherigi «ICA Eurasia Group» tárepinen jergilikli birge islesiwshilerdiń járdeminde shólkemlestirilgen bul kórgizbege 23 mámleketten 130 dan aslam kompaniya qatnaspaqta.
Kórgizbeniń ashılıwında awıl xojalıǵı Ózbekstannıń jalpı ishki ónimin qurawda jetekshilik etip atırǵanı hám ónim islep shıǵarıwdıń turaqlı ósiw pátlerine erisip atırǵanı atap ótildi.
«AgroWorld Uzbekistan» agrosanaat tarwında áhmiyetli ilaj bolıp, bıyıl óziniń yubileyin belgilep atırǵanın atap ótiw kerek. Kórgizbe awıl xojalıǵında innovaciyalar hám zamanagóy trendlerdi usınıw, olardı óndiriske engiziw, jergilikli biznesti rawajlandırıw hám eksporttı keńeytiw ushın isenimli platforma sıpatında kózge taslandı. 2006-jıldan berli kórgizbede 43 mámleketten 1 mıń 846 kompaniya qatnasqan.
«Iteca Exhibitions» xalıqaralıq kórgizbe kompaniyası bas direktorınıń orınbasarı Oyimxon Bobojonovanıń sózlerine qaraǵanda, kórgizbelerdi shólkemlestiriwdegi unamlı qatnas, sanaat hám bazar talapların hár tárepleme úyreniw «AgroWorld Uzbekistan»nıń nátiyjeli koncepciyasın belgilep berdi.
– Solay etip, qánigeler pútkil óndirislik shınjır: awıl xojalıǵı eginlerin jetistiriw hám sharwa malları jáne quslardı kóbeytiwden baslap, jıyın-terim, qayta islew hám saqlawǵa shekemgi processlerdi ásbap-úskeneler hám texnologiyalar menen tanısıw imkaniyatına iye boladı. Bıyıl kórgizbede Ózbekstan, Belgiya, Vengriya, Germaniya, Daniya, Hindstan, Ispaniya, Italiya, Qazaqstan, Qıtay, Koreya Respublikası sıyaqlı mámleketlerden 130 dan aslam kompaniya óz imkaniyatların usınbaqta. Dástúrge bola, Túrkiya 12 kompaniyadan ibarat milliy stendti kórsetip atır. Yaponiyanıń sırtqı sawdanı rawajlandırıw shólkemi (JETRO) kórgizbege birinshi márte qatnaspaqta, bul itibarǵa ılayıq waqıya bolıp tabıladı. Ol agrosanaat sektorı ushın innovaciyalıq sheshimlerdi usınıs etetuǵın 13 jetekshi yapon kompaniyasınıń imkaniyatların hám máplerin kórsetedi. Kórgizbeniń basqa debyutantları arasında Ispaniyanıń «Agricola» kárxanası miywelerdi sortlaw hám qayta islew, Italiyanıń «ROTA GUIDO» kompaniyası bolsa tayar sharwashılıq fermaların qurıw úskenelerin usınıp atır, – dedi O.Bobojonova.
Dástúrge bola, kórgizbeniń ekinshi kúni, 12-martta Fermerler kúni ilajı ótkeriledi. Onda kórgizbe qatnasıwshıları fermer hám diyqan xojalıqlarınıń basshıları hám bas qánigeleri menen ushırasadı.

Nasiba Ziyodullaeva,
Oybek Pardaev (foto), ÓzA