Ózbekstan Respublikası Konstituciyasınıń 77-statyasında ata-analar hám olardıń ornın basıwshı shaxslar perzentlerin er jetkenge shekem baǵıwǵa, olardıń tárbiyası, bilim alıwı, salamat, tolıq hám hár tárepleme kamal tabıwı jolında ǵamqorlıq etiwge májbúr ekenligi kórsetilgen.

Biraq, tilekke qarsı, jaslarımızdıń bir-birlerin túsinbewshiligi, ómirge jeńil kózqarasta bolıwı, erte shańaraq qurıw aqıbetinde arzımaǵan sebepler menen shańaraqlardıń ajırasıp ketiw jaǵdayları ushırasıp tur. Bunıń aqıbetinde erteńgi keleshegimiz bolǵan balalarımızdıń tálim-tárbiyası hám olardıń materiallıq támiynatında boslıqlar, kemshilikler júz bermekte. Álbette, bunda óz perzentiniń keleshegine biypárwa bolıp júrgen ata-analardıń ayıbı bar desek asıra siltegen bolmaymız. Bunday insanlar ushın elimiz nızamshılıǵında juwapkershilik belgilengen.
Jınayat isleri boyınsha Taxtakópir rayonlıq sudında bolıp ótken sud májilisinde usınday qılmıslı is kórip shıǵıldı.
Atap aytqanda, Puqaralıq isleri boyınsha Shımbay rayonlar aralıq sudınıń 2019-jıl 23-iyuldegi sud buyrıǵına tiykarlanıp óndiriwshi R.S nıń tárbiyasındaǵı 2017-jılı tuwılǵan Sh ismli perzentiniń támiynatı ushın hár aydaǵı is haqı hám basqa da tabıslarınıń 1/4 (tѳrtten bir) bólegi muǵdarında ol
18 jasqa tolǵanǵa shekem A.O dan aliment óndiriliwi belgilengen. Biraq, bul sud buyrıǵı ayıpker tárepinen óz waqtında orınlanbaǵan. Sonlıqtan, usı aliment pulları tólenbegeni ushın Jınayat isleri boyınsha Taxtakópir rayonı sudınıń 2024-jıl 7-may kúngi qararı menen perzenti ushın 54.531.479,01 sum aliment pulların tѳlemegeni ushın HJhK 474-statyası 1-bólimi menen ayıplı dep tabılıp, 15 sutka hákimshilik qamaqqa alıw jazası tayınlanǵan.
Biraq, bul sud qararı da ayıpker tárepinen óz waqtında orınlanbaǵan.
Sonday-aq, ayıplanıwshı A.O. 2024-jıldıń 1-mayınan 1-noyabrine shekem perzenti ushın tѳleniwi lazım bolǵan, jámi, 8.080.792,5 sum muǵdarında aliment tólewden bas tartıp kelgen.
Nátiyjede, bul puqaranıń islegen bul qılmısı Jınayat isleri boyınsha Taxtakópir rayonı sudınıń fevral ayındaǵı májilisinde kórip shıǵılıp, ayıpker Ózbekstan Respublikası jınayat kodeksinde belgilengen statyalar boyınsha ayıplı dep tabıldı hám oǵan nızam tiykarında erkinen ayırıw jazası tayınlandı.
Álbette, mámleketimiz tárepinen shańaraqlardıń bekkemligin támiyinlew baǵdarında bir qansha ámeliy isler ámelge asırılmaqta. Biraq, tilekke qarsı, turmısımızda joqarıda sóz etilgendey jaǵdaylardıń júz beriwi kewillerimizdi renjitedi.
Solay eken, hár bir shańaraq basshısı perzent tárbiyasına itibarlı kózqarasta qarawı hám olardıń keleshegi ushın juwapker ekenligin hár qashan yadında tutıwı lazım.

O. Maulenov,
Jınayat isleri boyınsha
Taxtakópir rayonlıq sudınıń baslıǵı.

Qaraqalpaqstan xabar agentligi.