Húrmetli Prezidentimiz Sh. Mirziyoevtiń usı jıl 5-mart kúni Korrupciyaǵa qarsı gúresiw milliy keńesi májilisinde qatnasıp, onda shıǵıp sóylegen sózi, meniń názerimde elimizde korrupciyasız ortalıq, korrupciyasız keleshekti jaratıwǵa qaratılǵan, anıq nátiyjelerge xızmet etetuǵın baǵdardı belgilep berdi, dep oylayman.
Ashıq tán alıwımız kerek, sońǵı segiz jıl ishinde mámleketimiz basshınıń tereń hám puqta oylanǵan siyasatı nátiyjesinde korrupciya illetine qarsı gúresiw, onı boldırmaw baǵdarında erisilgen nátiyjeler, kúndelikli turmısımızda óz sáwleleniwin tappaqta.
Anıq mısallarǵa júginsek, birinshi gezekte bul illetke qarsı gúresiw boyınsha huqıqıy mexanizmler jaratılıp bekkemlenip barılmaqta.
Sonıń menen birge, mámleketimizdegi ashıqlıq siyasatı nátiyjesinde, jámiyettegi túrli unamsız illetlerge qarsı jámiyetshiliktiń, ǵalaba xabar qurallarınıń belsendiligi artıp barmaqta.
Puqaralar turmısında úlken áhmiyetke iye, jer orınların ajıratıw aukcion sistemasında ámelge asırılmaqta.
Banklerden kredit alıw, balalar baqshaları hám mekteplerge balalardı qabıllaw, Joqarı oqıw orınlarına studentlikke qabıl etiliw sıyaqlı máselelerdegi xızmetlerdiń elektron túrge ótiwi, sanlastırılıwı, puqaralarımızǵa bir qansha qolaylıqlar jaratpaqta.
Mámleketlik xızmetler orayları arqalı, puqaralarımız elektron mámleketlik xızmetlerinen emin-erkin paydalanıp, jıl sayın xızmetlerdiń túrleri artıp barmaqta.
Elimizde rawajlanıwlar dawam eter eken, oǵan tosqınlıq etiwshi korrupciya illetine qarsı gúresiwde jámiyetshiliktiń rolin arttırıw, mámleketimiz basshısı atap ótkenindey, rayon, máhálleden baslap turmıslıq korrupciyaǵa qarsı gúresiwdiń ilajların kóriwde, hár birimiz belsendi bolıwımız zárúr.
Usı jerde, mámleketimiz basshısınıń jámiyetshilikke múrájat etip, korrupciyaǵa qarsı gúresiw ulıwma milliy wazıypa, hár bir Watansúyiwshi watanlasımızdıń hújdan isi ekenin atap ótkenligin ayrıqsha atap ótiwimiz kerek.
– Hámmemiz birden bir kúsh bolıp háreket etsek, álbette, úlken unamlı nátiyjege erisemiz, sonlıqtan máhálle belsendileri, nuraniylar, zıyalılar, jazıwshı hám shayırlar, kórkem óner hám mádeniyat xızmetkerleri, isbilermenler, belgili shaxslar, basshılar, deputat hám senatorlar – ulıwma pútkil jámiyetshilik birlesip, korrupciyaǵa «jámiyet denesindegi rak» sıpatında qarawı kerek» degen tereń mazmunǵa iye pikiri, hár birimiz sergek, qálbimiz hámiyshe oyaw bolıp, birlesip háreket etiwimiz zárúr ekenligin uqtırmaqta.
Insaniyat tariyxınan jaqsı málim, ilim menen ádep hár qanday dáwirde de, barlıq rawajlanıwlardıń negizi bolıp xızmet etip kelgen.
Sonlıqtan da, perzentlerimizdi ana qarnınan baslap, tuwrılıqqa, hújdan pákligine, bilim alıwǵa, ilim menen shuǵıllanıwǵa baǵdarlap tárbiyalay alsaq, olar júzimizdi jarqın etip, elimizdiń danq-abırayın asıratuǵın áwladlar bolıp jetilisetuǵınlıǵı anıq.

Rawaj Otarbaev,
Ózbekstan hám Qaraqalpaqstan Jazıwshılar awqamı aǵzası.
Qaraqalpaqstan xabar agentligi.