Mámleketimizdiń investiciyalar, sanaat hám sawda ministri Laziz Qudratov Ózbekstan Respublikası hám Franciya rawajlanıw agentligi (AFD) arasındaǵı 6-jıllıq másláhátlesiwde qatnastı. Ilajda “Proparco” hám “Expertise France” wákilleri, jetekshi ekspertler hám isbilermenler qatnastı.

Sóylesiw waqtında birgelikte erisilgen jetiskenlikler hám ekonomikalıq rawajlanıwdıń jańa imkaniyatları dodalanıp, reformalardı qollap-quwatlaw, infrastruktura joybarların ámelge asırıw hám «jasıl» ekonomikanı rawajlandırıwǵa qaratılǵan birge islesiw nátiyjesi shıǵarıldı. AFD elimizde xalıqtıń turmıs dárejesin arttırıw, ekologiyalıq hám sociallıq mashqalalardı sheshiw, jeke menshik sektordı qollap-quwatlawǵa múnásip úles qosıp atırǵanı atap ótildi.
Sońǵı jıllarda Ózbekstan menen Evropa Awqamı arasındaǵı sawda hám investiciyalıq qatnasıq bekkemlengeni atap ótildi. Máselen, 2024-jılı tovar almasıw bahası 6,4 milliard dollardı qurap, aldınǵı máwsimge salıstırǵanda 5,2 procent ósken. Mámleketimiz 6200 túrdegi ónimimiz eski kontinent bazarına shıǵarıw imkaniyatın beretuǵın GSP+ baǵdarlaması sheńberindegi statusınan nátiyjeli paydalanǵanı tabıslı faktorlardan biri bolıp esaplanadı. Búgingi kúnde tovarlarımız EA bazarına kirip, eksporttı diversifikaciyalaw, islep shıǵarıwshılarımızdıń sırt eldegi qatnasıwın keńeytiwge xızmet etpekte.
Házirgi waqıtta respublikamızda ulıwma 30 milliard evrodan aslam investiciyalıq joybar ámelge asırıp atırǵan mıńnan aslam Evropa kompaniyası jumıs islemekte. Bul processte Franciya tájiriybesi sanaat strategiyasın islep shıǵıw, regionallıq rawajlanıw baǵdarlamaları hám jeke menshik sektordı bekkemlewge qaratılǵan reformalardı qollap-quwatlaw arqalı ekonomikalıq ósiwdiń qosımsha drayverine aylanıwı múmkin.
Sonıń menen birge, tárepler aymaqlararalıq qatnasıqtı tereńlestiriw, qosımsha qarjılay resurslar tartıw, oǵada áhmiyetli shiyki zat tarawındaǵı birge islesiwdi jáne de rawajlandıratuǵın bir qatar áhmiyetli baǵdarlardı belgilep aldı.
Usı tarawlardı qollap-quwatlaw maqsetinde Ózbekstanda paydalı qazılamalar qazıp alıw tarawında Evropa tikleniw hám rawajlanıw banki menen birgelikte islep shıǵılǵan normativlik hújjetler qabıl etildi. Bul qádem xalıqaralıq standartqa sáykes keledi hám mámleketimiz taw-kán sanaatına investiciya tartıw ushın qosımsha sharayat jaratadı.
Ilaj sońında qatnasıwshılar Ózbekstan menen Franciya rawajlanıw agentligi arasındaǵı birge islesiwdiń jáne de tereńlesiwi, investiciya, innovaciya hám turaqlı ekonomikalıq ósiw támiyinlenip atırǵan jetekshi orayǵa aylanıw jolında qádem taslap atırǵan elimizde Evropa kompaniyaları ushın jańa imkaniyatlar ashılatuǵınına isenim bildirdi.

M.Pirmatova ÓzА