Búgingi kúnde korrupciyaǵa qarsı gúresiw hám onıń aldın alıw mámleketlik siyasattıń tiykarǵı baǵdarlarınan birine aylandı.

Ásirese, mámleketlik kárxanalar hám tarmaqlarda ashıq-aydınlıqtı támiyinlew, nızamsız háreketlerdiń aldın alıw maqsetinde sistemalı ilajlar kórilmekte. Usı kózqarastan, «Aymaqlıq elektr tarmaqları» akcionerlik jámiyetinde de bul baǵdardaǵı jumıslar jáne de kúsheytilmekte.
«Aymaqlıq elektr tarmaqları» akcionerlik jámiyetiniń korrupciyaǵa qarsı gúresiw hám komplaens qadaǵalaw xızmeti baslıǵı Husniddin Allamurodov tómendegilerdi málim etti:
– Bıyılǵı jıldıń 5-mart kúni Prezident Shavkat Mirziyoevtiń basshılıǵında ótkerilgen májiliste korrupciyaǵa qarsı gúresiw boyınsha eń áhmiyetli wazıypalar belgilep berildi. Onda mámleketimizde korrupciyaǵa qarsı keskin ilajlardıń kóriliwi, hár bir mámleketlik xızmetker hám puqaranıń bul illetke qarsı gúresiwde juwapkershiligin jáne de arttırıw máselelerine itibar qaratıldı.
Sonnın kelip shıǵıp, jaqında «Aymaqlıq elektr tarmaqları» AJda korrupciyanıń aldın alıw boyınsha alıp barılıp atırǵan jumıslardıń nátiyjeliligi hám bul baǵdarda ámelge asırılıwı zárúr bolǵan áhmiyetli wazıypalarǵa baǵıshlanǵan májilis ótkerildi.
Korrupciyaǵa qarsı gúresiwde tiykarǵı itibar bul illettiń kelip shıǵıwına imkaniyat beretuǵın sharayatlardı saplatsırıwǵa qaratılmaqta. Sol sebepli, májiliste hár bir shólkem hám puqara aldında korrupciyasız keleshekti qurıw wazıypası turǵanı atap ótildi.
Májiliste «Aymaqlıq elektr tarmaqları» AJ hám onıń quramındaǵı filial hám kárxanalarınıń xızmetkerleri tárepinen nızamsız háreketlerdiń aldın alıw, olardıń kelip shıǵıwına jol qoyıp atırǵan faktorlardı saplastırıw máseleleri dodalandı. Sonday-aq, sistemada bar huqıqbuzarlıqlar sın kózqarasta tallandı.
Májiliste mámleketimiz basshısı tárepinen belgilengen tiykarǵı wazıypalardıń mazmun-mánisi, sonday-aq, tarawda ámelge asırılıwı zárúr bolǵan jumıslar dodalandı.
Sonday-aq, korrupciyalıq jaǵdaylardıń aldın alıwǵa qaratılǵan sanlastırıw processlerin dawam ettiriw, komplaens qadaǵalaw xızmetleriniń jumısın qayta kórip shıǵıw hám jáne de jedellestiriw boyınsha usınıslar berildi. Tarawdaǵı korrupciyaǵa qarsı ilajlardı kúsheytiw, atap aytqanda, xalıqaralıq qarjı institutlarınıń qatnasıwında ámelge asırılıp atırǵan joybarlarda ashıq-aydın sistema jaratıw máselelerine ayrıqsha itibar qaratıldı.
Barlıq xızmetkerlerge korrupciya jaǵdaylarına jol qoymaw hám onıń aldın alıw boyınsha birgelikte háreket etiw boyınsha túsinikler hám kórsetpeler berildi.

Nasiba Ziyodullaeva, ÓzA