Kóksaray rezidenciyasında Xalıqaralıq hayal-qızlar kúni múnásibeti menen bayram ilajı bolıp ótti.

Ilaj aldında Ózbekstan Respublikası Prezidenti Shavkat Mirziyoev shıǵıp sóylep, húrmetli analar, áziz apa-qarındaslardı qızǵın qutlıqladı. Hayal-qızlardıń huqıq hám máplerin tolıq támiyinlew, qádir-qımbatın ulıǵlaw mámleketimiz siyasatında jetekshi orında ekenin atap ótti.
Atap aytqanda, 2017-jılı basqarıw tarawında xızmetkerlerdiń ortasha 20 procentin hayal-qızlar quraǵan bolsa, házirgi waqıtta bul san 35 procentke jetti. Oliy Majlis Nızamshılıq palatası deputatlarınıń 38 procentin, Senat aǵzalarınıń 27 procentin hayal-qızlar quramaqta.
Bul jámiyetimizdiń rawajlanıwına da unamlı tásir etpekte. Eń áhmiyetlisi, aqıllı, bilimli hám talantlı hayal-qızlar mámleket hám jámiyettiń barlıq tarawlarında úlgi bolmaqta.
Ótken jılı Olimpiada hám Paralimpiada oyınlarında hayal-qız sportshılarımızdıń úshewi altın, segizi gúmis, úshewi bronza medalın qolǵa kirgizdi. Mádeniyat hám kórkem óner tarawındaǵı abıraylı xalıqaralıq tańlawlarda 25, mámleket kólemindegi tańlawlarda bolsa 71 talantlı qız jeńimpaz boldı.
Prezidentimiz hayal-qızlardıń awırın jeńil etiw, olarǵa qosımsha sharayatlar jaratıw máselelerine ayrıqsha itibar qarattı.
– Úy jumısları hám perzent tárbiyasınan artıp, bilim alıp atırǵan, miynet etip atırǵan hám isbilermenlik penen shuǵıllanıp atırǵan hayal-qızlar zamanımızdıń haqıyqıy qaharmanları, desek, durıs boladı. Jańa Ózbekstanda hayal-qızlardıń awırın jeńil etiw, olar ushın barlıq tarawlarda zárúr sharayatlardı jaratıp beriw bárqulla mámleketlik siyasattıń eń tiykarǵı baǵdarlarınan biri bolıp qaladı, – dedi Shavkat Mirziyoev.
Sonlıqtan, jańalanǵan Konstituciyamızdaǵı sociallıq mámleket principine muwapıq, hayal-qızlardı sociallıq qorǵaw da jańasha shólkemlestirilmekte. Bıyılǵı jılı mayıplıǵı bolǵan 162 mıń hayal-qızǵa sanatoriy, emlewxana hám ózleri jasap atırǵan máhállede medicinalıq járdem kórsetiledi, baǵıwshısın joyıtqan 130 mıń hayal-qızǵa materiallıq járdem beriledi, jáne 6 mıńınıń turaq jay sharayatları jaqsılanadı, miynetke jaramlı hayal-qızlar jumısqa jaylastırıladı.
Sonday-aq, hár jılı awır jaǵdayǵa túsip qalǵan 50 mıń hayal-qız mámleketimizdegi payızlı jerlerge oqıw hám dem alıw ushın jiberiledi.
Hayal-qızlardıń salamatlıǵı – hár táremleme salamat hám qúdiretli jámiyet tiykarǵı bolıp esaplanadı. Usı maqsette, 230 tuwıw mákemesi 21 mıń eń zamanagóy medicinalıq úskeneler menen támiyenlenedi. Bunnan tısqarı, bıyılǵı jılda 1,5 million hayal-qızda rak keselligin erte anıqlaw maqsetinde skriningler ótkeriledi.
Qız balanıń oqıwı pútkil shańaraqqa payda keltiretuǵını jáne bir márte atap ótildi. Eger shańaraq bilimli, aǵartıwshı bolsa, jámiyettiń sanası, mádeniy dárejesi de joqarılaydı.
Studentlerdiń 52 procentten artıǵın hayal-qızlar quraǵanı, mine, usı jaqsı ideyanıń ámeliy nátiyjesi dep atap ótiw múmkin. Ótken jıldıń ózinde magistraturada oqıp atırǵan 15 mıńǵa shamalas hayal-qızlarǵa 100 milliard sumǵa shamalas kontrakt pulı tólep berildi.
Házirgi waqıtta 6 mıń 200 den aslam hayal-qızlar ilimiy jumıs penen shuǵıllanıp atırǵanı, ilimiy qollanbalardıń 25 procentin ilimpaz hayal-qızlar jaratıp atırǵanı da, jámiyette olardıń ornı bekkemlenip baratırǵanına derek beredi.
Hár bir shańaraqtaǵı qızlar baqsha, mektep penen tolıq qamtıp alınıwı, zamanagóy kásip-óner hám shet tillerin iyelewi, joqarı maǵlıwmatqa iye bolıwı ushın bunnan bılay da barlıq sharayatlar jaratıladı. Atap aytqanda, bıyıl 250 mıń qız joqarı bilimlendiriwge qamtıp alınadı. Bul 2017-jılǵa salıstırǵanda 3,5 esege kóp. Jáne 250 mıń hayal-qız kásip-óner hám isbilermenlikke oqıtıladı. «Jarqın keleshek» joybarı sheńberinde keminde 200 qız hár jılı dúnyanıń abıraylı joqarı oqıw orınlarına oqıwǵa jiberiledi.
Mámleketimiz basshısı hayal-qızlardıń bántiligin támiyinlew hám isbilermenlikke tartıw máselelerine ayrıqsha toqtap ótti.

Usı baǵdardaǵı ámeliy qádem sıpatında Sawda-sanaat palatası janında Isbilermen hayal-qızlar keńesin shólkemlestiriw baslamasın alǵa qoydı. Bul keńes orınlarda hayal-qız isbilermenlerdi qıynap atırǵan turmıslıq mashqalalardı sheshiw boyınsha tikkeley parlament aldında másele qoyıw wákilligine iye boladı.
Bıyıl máhállelerde hayal-qızar isbilermenligi joybarları ushın qosımsha 3,3 trillion sum ajıratıladı. Atap aytqanda, shańaraqlıq baǵdarlamalar sheńberinde jáne 100 million dollar beriledi. Oǵan qosımsha túrde kommerciyalıq bankler de 100 million dollar tartıp, máhállelerde ózin-ózi bánt etken hayal-qızlarǵa 50 million sumǵa shekem girewsiz kreditler ajıratadı.
Atap ótilgenindey, hayal-qızlardıń isbilermenligin rawajlandırıw boyınsha 4 basqıshlı jańa sistema jolǵa qoyıladı.
Birinshi basqıshta bizneske qızıqqan, biraq kónlikpesi bolmaǵan 20 mıń hayal-qız isbilermenlikke oqıtıladı. Ekinshi basqıshta ózin-ózi bánt etken 100 mıń hayal-qızdıń kishi isbilermen bolıwına járdem beriledi. Úshinshi basqıshta «Hamroh» kompaniyası hár bir rayonda 2 den kishi kárxananı úlgili orta biznes dárejesine alıp shıǵıwǵa juwapker boladı. Tórtinshi basqıshta eń belsendi 50 hayal-qız isbilermen jıllıq aylanısı 100 milliard sumnan artatuǵın «chempion isbilermen»ge aylandırıladı.
Ulıwma, bıyıl kásip-ónerge oqıtıw, jumıslı etiw hám isbilermenelikti rawajlandırıw esabınan 2 million hayal-qızdıń bántligin támiyinlew maqset etilgen.
– Aldımızǵa barlıq taraw hám baǵdarlarda oǵada ullı maqsetlerdi qoymaqtamız. Oǵan erisiw ushın biz súyenetuǵın jetik áwladtı tárbiyalap, kamalǵa keltiriw siz, ázizlerdiń – pidayı analardıń qolında, – dedi mámleketimiz basshısı.
Ózbekstan Respublikası Prezidentiniń usı jıl 3-marttaǵı qararına muwapıq 28 qız Zulfiya atındaǵı Mámleketlik sıylıq penen, 4-marttaǵı pármanǵa muwapıq, miynet etiwde hám jámiyetlik jumıslarda úlken nátiyjelerge erisken bir topar hayal-qızlar orden hám medallar menen sıylıqlanǵan edi. Ilajda, áne, usınday joqarı sıylıqlar saltanatlı túrde tapsırıldı.
Máresim sońında Shavkat Mirziyoev xalqımız atınan hayal-qızlardı jáne bir márte qutlıqlap, jaqsı tilekler bildirdi.
-Hámmeńizge saw-salamatlıq, shańaraqlarıńızǵa tınıshlıq-amanlıq, dúnyadaǵı eń úlken baylıq – shańaraqlıq baxıt-ıǵbal yar bolıwın tileymen. Hámiyshe perzentlerińiz hám jaqınlarıńız, el-xalqımızdıń ardaǵında júriw nesip etsin, – dedi Prezident.
Bayram sheńberinde «Ózbekstan» ánjumanlar sarayında saltanatlı koncert bolıp ótti.

ÓzA