Búgin mámleketimizdiń qaysı aymaǵına barmayıq, barlıq orınlarda úlken qurılıs hám dóretiwshilik islerdiń ámelge asırılıp atırǵanınıń gúwası bolamız. Sońǵı jılları húrmetli Prezidentimiz basshılıǵında xalqımızdıń óz turmısınan razı bolıp jasawın támiyinlew ushın bir qatar párman hám qararlar qabıllanıp, turmısımızǵa engizilmekte.

Prezidentimizdiń tek ǵana Qaraqalpaqstan Respublikasın sociallıq-ekonomikalıq rawajlandırıw maqsetinde qabıl etilgen bir neshe párman qararları búgin turmısımızda úlken ózgerislerdi júzege shıǵarmaqta. Atap aytqanda, Shımbay rayonında ámelge asırılıp atırǵan qurılıs hám abadanlastırıw jumısları bunıń ayqın mısalı bola aladı. Ásirese, Prezidentimizdiń 2024-jıl 23-sentyabr kúngi «Kámbaǵallıqtan abadanlıqqa qaray baǵdarlamasın ámelge asırıw boyınsha birinshi gezektegi ilajlar haqqında»ǵı qararına tiykarlanıp, Shımbay rayonınıń 2024-2025-jıllarda jedel kompleks rawajlandırıw rejelestirilgen rayonlar qatarına kirgiziliwi pútkil shımbaylılardı quwanıshqa bólemekte.
Shımbay rayonında usınday iygilikli jumıslardıń óz waqtında ámelge asırılıwında hayal-qızlarımızdıń da tutqan ornı ayrıqsha. Sonıń ishinde, kem támiyinlengen shańaraqlardı materiallıq hám ruwxıy jaqtan qollap-quwatlaw, olardıń shańaraqta hám jámiyette óz ornına iye bolıwına járdem beriw, jámiyetlik turmısta belsendi hayal-qızlardıń liderlik qábiyletlerin júzege shıǵarıw boyınsha da nátiyjeli jumıslar ámelge asırılmaqta. Usınday belsendi hayal-qızlarımızdıń úlgili isleri taraw basshıları hám respublikamız húkimeti tárepinen múnásip túrde bahalanıp, hár tárepleme xoshametlenip barılmaqta.
Solardıń qatarında meniń de azı-kem islegen xızmetlerim múnásip bahalanıp, Ózbekstan Respublikası Prezidentiniń pármanı menen «Dwstlik» ordeni menen sıylıqlandım hám ózime kórsetilgen usınday itibar hám xoshametten sheksiz quwanıshqa bólendim. Maǵan berilgen bul sıylıq tek ǵana maǵan emes, al, pútkil Qaraqalpaqstan, sonıń ishinde, shımbaylı hayal-qızlarǵa berilgen joqarı sıylıq hám Prezidentimizniń isenimi dep bilemen. Bul úlken isenimdi aqlaw ushın ózimniń barlıq bilim hám is-tájiriybemdi, kúsh-jigerimdi jumsayman. Pursattan paydalanıp, elimizdiń barlıq hayal-qızların 8 mart-xalıqaralıq hayal-qızlar kúni menen shın kewilden qutlıqlayman, olardıń iygilikli islerine tabıslar tileymen.

Gúlzar Mambetniyazova,
Shımbay rayonı hákiminiń orınbasarı-shańaraq hám hayal-qızlar bóliminiń baslıǵı.
«Dwstlik» ordeni iyesi.
Qaraqalpaqstan xabar agentligi.