Arnawlı ekonomikalıq zonalardıń jumıs islew múddetine baylanıslı sheklewler biykar etiledi.

Bul baǵdarda Prezidenttiń «Arnawlı ekonomikalıq hám sanaat zonaları jumısınıń nátiyjeliligin arttırıw boyınsha qosımsha ilajlar haqqında»ǵı PP-41-sanlı pármanı qabıl etildi.

Pármanǵa bola, 2025-jılı arnawlı ekonomikalıq hám sanaat zonaların rawajlandırıwdıń tiykarǵı maqsetli kórsetkishleri etip tómendegiler belgilendi:

– arnawlı ekonomikalıq zonalarda 2,3 milliard AQSh dolları muǵdarındaǵı investiciyalardı ózlestiriw, eksport kólemin 1 milliard AQSh dollarına jetkeriw, óndiris kólemin 4,3 milliard AQSh dollarına teń muǵdarda támiyinlew hám 12 mıń jańa turaqlı jumıs orınların jaratıw;

– sanaat zonalarında 800 million AQSh dolları muǵdarındaǵı investiciyalardı ózlestiriw, eksport kólemin 512,2 million AQSh dollarına jetkeriw, óndiris kólemin 1,8 milliard AQSh dollarına teń muǵdarda támiyinlew hám 17 mıń jańa turaqlı jumıs orınların jaratıw.

Jańadan qurılatuǵın qánigelestirilgen zonalar tek ǵana arnawlı ekonomikalıq zona yamasa sanaat zonası túrinde shólkemlestiriledi.

Arnawlı ekonomikalıq zonalar jumısı boyınsha tek ǵana eksportqa qaratılǵan joybarlarǵa qánigelesken, maydanı oralǵan arnawlı eksport zonası túrinde de shólkemlestiriliwi múmkin.

Qaraqalpaqstan xabar agentligi