8 mart – Xalıqaralıq hayal-qızlar kúni bayramı múnásibeti menen Jaslar isleri agentliginiń Qaraqalpaqstan Respublikası basqarması, Ózbekstan jaslar awqamı Qaraqalpaqstan Respublikası Keńesi menen birgelikte huqıq qorǵaw uyımlarınıń hayal-qız xızmetkerleri ushın “Zákawat” intellektuallıq oyını ótkerildi.

Onda Qaraqalpaqstan Respublikası Ishki isler ministrligi, Qorǵanıw ministrligi, Bajıxana basqarması, Milliy gvardiya, shegara bólimi hám Ayrıqsha jaǵdaylar basqarmasınıń hayal-qız xızmetkerlerinen ibarat 6 komanda qatnasıp, aqıl jarısında óz-ara bellesti.
Ziyreklik, shaqqanlıq, joqarı bilim hám potencial talap etiwshi bul intellektuallıq oyın qızǵın hám mawasasız tartıslarǵa bay boldı.
Aqıl shınıqtırıw sınaqları komandalardı awızbirshilik hám tatıwlıqqa shaqırıp qalmastan, huqıq qorǵaw uyımları hayal-qız xızmetkerleriniń de doslasıwına imkaniyat jarattı.
Oyın juwmaǵında, Qaraqalpaqstan Respublikası Ishki isler ministrligi birinshi, Ózbekstan Milliy gvardiyası Qaraqalpaqstan Respublikası boyınsha Qorǵaw basqarması ekinshi, Qaraqalpaqstan Respublikası Bajıxana basqarması komandası úshinshi orındı iyeledi.
Jarıs juwmaǵında jeńimpazlar hám belsene qatnasqanlar diplom hám bahalı sawǵalar menen sıylıqlandı.

Qaraqalpaqstan xabar agentligi.