Elimizde hayal-qızlarǵa múnásip húrmet kórsetilip, olardıń jámiyetlik turmıstaǵı ornın hám abırayın arttırıwǵa ayrıqsha itibar qaratılmaqta.

Sheber ónerment Biybisara Qunnazarovanıń da kóp jıllıq miynetleri qádirlenip, Prezident pármanı tiykarında «Dwstlik» ordenine múnásip dep tabıldı.
B.Qunnazarova, 1954-jılı Qaraqalpaqstan Respublikası Moynaq rayonında tuwılǵan. 2019-jıldan baslap «Qolda gilem toqıw» baǵdarı boyınsha Ózbekstan Respublikası «Ónerment» birlespesiniń aǵzası esaplanadı. Húrmetli ónerment eski gilemleri menen xalıq ámeliy kórkem óneri hám umıtılıp atırǵan ónermentshilikti qayta tiklew hám rawajlandırıw baǵdarında belsende jumıs alıp barmaqta. Qara úy (otaw)diń bezewlerin islew boyınsha sheber usta, áwladtan-áwladqa miyras bolıp atırǵan aq basqur, qızıl basqurlardı toqıwda teńi joq.
Qaharmanımız «Ónerli shoqqıǵa boy sozadı» súreni astında jumıs alıp baradı. Onıń tiykarǵı maqseti jergilikli xalıqtı ónermentshilikke tartıw, olardıń abadanlıǵın arttırıwǵa járdemlesedi.
B.Qunnazarova ónermentshilik ónimleri menen hár qıylı respublikalıq hám xalıqaralıq kórgizbelerge, tańlawlarǵa hám sawda-yarmarkalarına turaqlı túrde qatnasıp, sıylı orınlardı iyelep kelmekte.
Sonıń ishinde, «Jańa Ózbekstan jasları, birleseyik!» festivalı sheńberinde «Ónermentler kórgizbesi» joybarında belsene qatnasqanı ushın húrmet jarlıǵı hám basqa da kóplegen «Xalıqaralıq ónermentshilik festivalı»na qatnasıp, sertifikat penen sıylıqlanǵan.
Usı óner menen 6 jıldan berli shuǵıllanıp, ul-qızlarına da úyretip, sheber dárejesine jetkergen. Máhállelerdegi jumıssız hayal-qızlar hám jaslarǵa ustazlıq etip, óz óneriniń sırların úyretken. Búgingi kúnge shekem 70 ke shamalas shákirt tayarlaǵan. Sonday-aq, ol segiz perzentti kamalǵa keltirip atırǵan mehriban ana bolıp tabıladı.

Gulnoza Boboeva, ÓzA