Sanlı texnologiyalar ministri Sherzod Shermatov «MWC Barcelona – 2025» Jáhán mobil kongresi sheńberinde «Ookla» shólkeminiń prezidenti hám bas direktorı Stiven Be, Strategiya boyınsha bas direktor Chip Strenj hám shólkemniń Arqa Aziya hám Oraylıq Aziya regionları boyınsha sawda direktorı Viktor Zeng penen ushırastı.

Ushırasıwda internet infrastrukturasın rawajlandırıw hám sapa monitoringin kúsheytiw boyınsha pikir alısıldı.
Bunnan tısqarı, sóylesiw dawamında aymaqlarda 5G texnologiyalarınıń processlerin jedellestiriw, mobil baylanıs operatorları ushın innovaciyalıq texnologiyalıq sheshimlerdi sınaqtan ótkeriw hám olardıń xalıqaralıq tájiriybege tiykarlanǵan halda rawajlanıwın qollap-quwatlaw máseleleri de kórip shıǵıldı.
Ushırasıwda «Ookla» shólkemi Ózbekstannıń sońǵı jılları mobil internet tezligi boyınsha úlken kórsetkishlerge eriskenin atap ótti.
Maǵlıwmat ushın, «Ookla» – global internet tezligin ólshew hám tallaw menen shuǵıllanatuǵın jetekshi shólkem.
Sonday-aq, ushırasıw dawamında shólkem wákilleri Speedtest Global Index nátiyjelerine bola, 2020-jılı Ózbekstan 133-orındı iylegeni, 2025-jıl yanvar jaǵdayına bola mámleket usı reytingte 68-orınǵa kóterilgeni, usı tárizde Ózbekstan 2020-jıldan beri 65 orınǵa joqarılaǵanın atap ótti.
Ushırasıw sońında tárepler keleshekte birge islesiw joybarları ústinde islesiw máselelerin dodaladı.

N.Rahmonova,
ÓzA