«Kredit málimleme almasıwı haqqında»ǵı nızamǵa ózgerisler hám qosımshalar kirgizildi. Bul haqqında Ádillik ministrligi xabar berdi.

Oǵan bola, kredit kelisimin dúziw qadaǵan etilgen shaxslar reestri dúziledi. Bul kredit kelisimin dúziwi múmkin bolmaǵan shaxslar haqqındaǵı maǵlıwmatlardı óz ishinle alǵan maǵlıwmatlar bazası bolıp, kredit byuroları tárepinen alıp barıladı.
Oraylıq bank usı reestr júrgiziw tártibin belgileydi. Sonday-aq, kredit byuroları ushın ustav kapitalınıń eń az muǵdarı 2 milliard sum etip belgilendi.
Eger de kredit byuroları kredit málimlemesi almasıwı haqqındaǵı hám kredit byurolarınıń jumısın tártipke salıwshı nızamshılıq talaplarına ámel etpese, byurolar xızmeti tutınıwshılarınıń huqıqların buzsa, qálbeki hújjetlerden paydalanılǵan jaǵdaylar anıqlansa Oraylıq bank olarǵa sankciyalar hám BEMniń 5 mıń esesine shekemgi muǵdarda járiyma qollanıwǵa haqılı.
Bunnan tısqarı, fizikalıq tárep óziniń xabarısız kredit rásmiylestiriliwiniń aldın alıw ushın kredit byurosına arza berip, óziniń atına kelisim dúziwdi qadaǵan etiwi múmkin.

Qaraqalpaqstan xabar agentligi