Ózbekstan Respublikası Prezidenti Shavkat Mirziyoev 5-mart kúni mámleketimizde sapar menen bolıp turǵan Shanxay birge islesiw shólkeminiń bas xatkeri Nurlan Ermekbaevtı qabılladı.

Bul abıraylı shólkem sheńberindegi kóp tárepleme sheriklikti rawajlandırıwdıń áhmiyetli máseleleri dodalandı.
Turaqlılıq hám qáwipsizlikke qáwip salıp atırǵan ulıwmalıq qáwip-qáterlerge qarsı gúresiwde ámeliy háreketlerdi keńeytiw, jaqsı qońsıshılıq, isenim hám sheriklik principleri tiykarında birge islesiwdi jáne de tereńlestiriw áhmiyetli ekeni atap ótildi.
Samarqand sammitinde baslanǵan ShBSh jumısın modernizaciyalaw procesin dawam ettiriw, sonıń ishinde, shólkemniń barlıq strukturaları jumısınıń nátiyjeliligin arttırıwǵa ayrıqsha itibar qaratıldı.
«Jańa ekonomikalıq sóylesiw»di rawajlandırıw koncepciyası hám mámleketimizdiń basqa bir qatar baslamaların ámelge asırıw zárúr ekenligi atap ótildi. Olar sawdanı ápiwayılastırıw haqqındaǵı kelisim, elektron kommerciyalıq baǵdarlama, investiciyalardı qollap-quwatlaw kompleksi, logistikada sanlastırıw rejesi, «ShBSh keleshek texnologiyaları» baǵdarlaması, Azıq-awqat qáwipsizligi atlası hám basqalardı qabıllaw bolıp esaplanadı.
Sonday-aq, Qıtayda bolajaq ShBSh sammitine tayarlıq kóriw máseleleri dodalandı.

ÓzA