Ózbekstan Respublikası Prezidenti Shavkat Mirziyoev elimizde rásmiy sapar menen bolıp turǵan Gruziya Bas ministri Irakliy Kobaxidzeniń basshılıǵındaǵı delegaciyanı qabılladı.

Ushırasıw aldında joqarı mártebeli miyman mámleketimiz basshısına Gruziya Prezidenti Mixail Kavelashvilidiń sálemi menen jaqsı niyetlerin jetkerdi.
Sawda-ekonomika, investiciya, transport-logistika, turizm hám mádeniyat tarawlarındaǵı óz-ara paydalı birge islesiwdi keńeytiw máseleleri kórip shıǵıldı.
Parlamentler hám húkimetler dárejesindegi baylanıslar jaqsılanǵanı ayrıqsha minnetdarshılıq penen atap ótildi. 2024-jıl óz-ara tovar almasıw 50 procentke arttı, birgeliktegi kárxanalar sanı hám júk aylanısı kólemi kóbeydi. Paytaxtlar arasında tuwrıdan-tuwrı aviareysler ámelge asırılmaqta. Mámleketimizde gruziyalıq investorlar qatnasında shólkemlestirilgen sanlı bank jumıs alıp barmaqta. Gumanitar baǵdarda ótken jılı Tbilisi qalasında Ózbekstan mádeniyatı hám kinosı kúnleri tabıslı ótkerildi.
Sóylesiw dawamında usı kúnlerde Tashkent qalasında bolıp ótken Húkimetleraralıq komissiyasınıń gezektegi májilis juwmaqları joqarı bahalandı.
Tovar almasıw tezligin saqlap qalıw, eksport hám import proporcionallıǵın támiyinlew, sanaat kooperaciyası joybarların alǵa qoyıw, transport-tranzit potencialınan nátiyjeli paydalanıw, sonday-aq, eki mámleket aymaqların ekonomikalıq birge islesiwde jedel tartıw boyınsha óz-ara muwapıqlasqan ilajlar kóriw kerek ekenligi atap ótildi.
Sanlastırıw hám turizm infrastrukturasın rawajlandırıw baǵdarındaǵı sheriklik hám almasıwlardı keńeytiwge ayrıqsha itibar qaratıldı.
Erisilgen kelisimlerdi ámelge asırıw maqsetinde keleshekte Ózbekstan hám Gruziya húkimetleri dárejesinde tıǵız birge islesiwge kelisip aldı.

ÓzA