Pilleshilik nawqan qurtın baǵıw, pille jetistiriw kompleksi bolıp, awıl xojalıǵınıń pilleshilik sanaatı ushın shiyki zat jetkerip beretuǵın tiykarǵı tarmaqlarınan biri bolıp esaplanadı. Bul taraw dáramatlı bolǵanı ushın da mámleketimizde pille jetistiriw keń jolǵa qoyılǵan. Atap aytqanda, házirgi kúnde pille jetistiriwshi jetekshi mámleketler ishinde Ózbekstan 3-orındı iyelep turıptı.

Bunda álbette, taraw xızmetkerleriniń bilim hám tájiriybesi úlken áhmiyetke iye. Sol sebepli, házirgi kúnde elimizdiń barlıq wálayat hám rayonlarında pilleshilik tarawında hayal-qızlardı oqıtıw maqsetinde oqıw seminarı shólkemlestirilmekte.
Ministrler Kabinetiniń « Pilleshilik tarawında hayal-qızlardı basqıshpa-basqısh jumıs penen támiyinlew ilajları haqqında»ǵı qararınıń orınlanıwı sheńberindegi bul oqıw-seminarları Tashkent, Buxara, Surxandárya, Xorezm, Ferǵana, Namangan wálayatlarında hám Qaraqalpaqstan Respublikasında da bolıp ótti.
Pilleshilik hám jún sanaatın rawajlandırıw komiteti, Shańaraq hám hayal-qızlar komiteti hám jergilikli hákimlikler tárepinen qıtaylı hám vetnamlı birge islesiwshi qánigeler menen birgelikte shólkemlestirilgen seminarlarda «Agropille» JShJ basshıları, bas pillekesh, agronomlar, klasterler, jumıstı bólip alıp islewshiler hám lider pillekesh hayal-qızlar qatnastı.
Seminarda pille jetistiriwshilerdiń materiallıq mápdarlıǵın arttırıw, shańaraqlarǵa tarqatılǵan pilleniń durıs tárbiyalanıwın jolǵa qoyıw, tut atızların shólkemlesitiriw hám úy sharayatında tayar jipek islep shıǵarıwdı jolǵa qoyıw boyınsha túsinikler berip ótti.
Sonday-aq, seminarlarda pilleni Vetnam hám Qıtay tájiriybesi tiykarında sanaat túrinde jetistiriwdi jolǵa qoyıw boyınsha sırt el qánigeleri tárepinen onlayn bayanatlar tıńlandı.

Bunday oqıw-seminarlardı hár sherekte ótkerip barıw rejelestirilgen.

ÓzA