Prezident janındaǵı Mámleketlik xızmetti rawajlandırıw agentliginiń baslaması hám birge islesiwshi shólkemlerdiń járdeminde shólkemlestirilgen seminarda Agentlik juwapkerleri, Qaraqalpaqstan Respublikası Ministrler Keńesi basshılıǵı, aymaqtaǵı 44 shólkem hám uyımlarda jumıs alıp barıp atırǵan hayal-qızlar, ǴXQ xızmetkerleri hám jámiyetshilik wákilleri qatnastı.

Seminar mámleketlik uyımlar hám shólkemlerdegi hayal-qızlardıń tarawdaǵı xızmetin qollap-quwatlaw, olardıń liderlik kompetenciyaların rawajlandırıw, mámleketlik puqaralıq xızmetindegi reformalardan xabardar etiw, mashqalalardı tereń úyreniw maqsetinde shólkemlestirildi.
Seminar aldınan sózge shıqqanlar sońǵı jılları Ózbekstanda mámleketlik basqarıwda hayal-qızlar ushın múnásip miynet sharayatların jaratıp beriw, olardı qollap-quwatlaw maqsetinde áhmiyetli qádemler qoyılǵanın atap ótti. Tarawdıń normativlik-huqıqıy bazası jetilistirilgenin málim etti. Prezidentimizdiń uzaqtı gózlegen ádil siyasatları nátiyjesinde mámleketlik hám jámiyetlik basqarıwda hayal-qızlardıń úlesi artıp, bul xalıqaralıq kórsetkishlerde de óz kórinisin tawıp atırǵanın bildirdi.
Seminarda tájiriybeli hám potenciallı juwapker shaxslar, taraw qánigeleri basshı hayallarda liderlik, xalıqshıl, krevtivlik kónlikpelerdi qáliplestiriw, mámleket xızmetinde innovaciyalıq texnologiyadardı qollanıwda hayal-qızlardıń roli, mámleketlik xızmetkerlerdiń salamatlıǵı –mámleketlik xızmettiń nátiyjelilik kepilligi, mámleketlik xıxmette shańaraq hám karera teń salmaqlılıǵın támiyinlew strategiyaları temalarında óziniń pikir-usınısların bildirdi. Tarawda jıllar dawamında basıp ótilgen turmıslıq tájiriybeleri menen ortaqlastı.
Seminar óz jumısın sektorlarda dawam ettirmekte. Onda qatnasıwshılar ushın «Mámleketlik xızmettegi hayal-qızlardıń jeke nátiyjeliligin arttırıw imkaniyatları», «Hayal-qızlarǵa zorlıq hám agressiyanıń psixologiyalıq tiykarları», «Insan huqıqların basqarıwdıń zamanagóy usılları», «Hayal-qızlardıń mámleketlik xızmetke beyimlesiwi sociallıq ózgeshelikleri», «Mámleketlik xızmettegi hayal-qızlardıń jámiyetshilik penen birge islesiwi: zamanagóy texnologiyalar hám trendler», «Mámleketlik puqaralıq xızmettegi hayal-qızlardı qollap-quwatlawdıń huqıqıy tiykarları» temalarında treningler shólkemlestirildi. Sektorlar óz jumısın kishi toparlarda islesiw, keys-stadi hám tartıslar sıyaqlı interaktiv túrlerde shólkemlestirdi. Seminar dawamında qatnasıwshılardıń tarawǵa baylanıslı usınıs hám baslamaları, mashqalaları sociallıq sorawnama arqalı úyrenildi.
Bir sóz benen aytqanda, bul seminar Qaraqalpaqstanda jumıs alıp barıp atırǵan mámleketlik xızmettegi hayal-qızlardıń baslama hám ileyaların qollap-quwatlaw, olardıń jańa bilim hám kónlikpeler alıwı, óz-ara tájiriybe almasıw, tarawdaǵı jumısların jáne de rawajlandırıw ushın ózine tán korpus wazıypasın atqardı, -dep málimleme beredi xs.uz saytı.

Qaraqalpaqstan xabar agentligi