Oliy Majlis Senatında Gruziya Bas ministri Irakliy Kobaxidze basshılıǵındaǵı delegaciya aǵzaları menen ushırasıw bolıp ótti.
Senat Baslıǵı T.Norboeva bul sapar etiw eki mámleket arasında dúzilgen tıǵız birge islesiw baylanısların rawajlandırıwda jańa bet ashıw ushın úlken imkaniyat ekenin atap ótti.
– Ózbekstan hám Gruziya xalıqlarınıń milliy úrp-ádetlerinde uqsaslıq baqlanadı, eki xalıq ta miymandos hám óz watanına sadıqlıq sıyaqlı qásiyetlerge iye,-dedi T.Norboeva. – Sońǵı jılları doslıq baylanısları áyyemgi dástúrlerge sáykes túrde rawajlanbaqta. Eki millet wákillerin óz-ara isenim tuyǵıları baylanıstırıp tur. Tashkentte «Ózbekstan – Gruziya» doslıq jámiyetiniń dúzilgeni hám «Megobroba» mádeniy orayı jumıs alıp barıwı da pikirimizdi tastıyıqlaydı.
Sóylesiw waqtında delegaciya aǵzalarına «Ózbekstan – 2030» strategiyasında belgilengen baslı wazıypalar, sol tiykarda ámelge asırılıp atırǵan keń kólemli reformalar haqqında tolıq maǵlıwmat berildi. Tek ǵana húkimetleraralıq emes, al parlamentleraralıq qatnasıqlardı bekkemlew, nızamshılıqtı jetilistiriwde tájiriybe almasıw, iske qosılmaǵan imkaniyatlardan aqılǵa uǵras paydalanıw óz-ara baylanıslardıń izbe-izligin támiyinleytuǵını atap ótildi.
I.Kobaxidze Gruziya Ózbekstan menen tıǵız birge islesiwdi rawajlandırıwdan mápdar ekenin bildirdi. Elimizde barlıq tarawlarda qolǵa kirgizilip atırǵan jetiskenliklerdi joqarı bahaladı. Mámleketimiz basshısı alıp barıp atırǵan reformalardıń turmısta óz kórinisin tawıp atırǵanın atap ótti.
Sonday-aq, sóylesiwde turizm, ekonomika, elektronika, agrar hám transport kommunikaciyası sıyaqlı tiykarǵı baǵdarlarda birge islesiw baylanısların bekkemlew máselelerine itibar qaratıldı.
Ushırasıwda eki mámleket arasında perspektivalı joybarlardı ámelge asırıw boyınsha óz-ara pikir almasıldı. Atap aytqanda, birge islesiwdiń búgingi jaǵdayı tallanıp, jańa rejelerdi belgilep alıwǵa baylanıslı máseleler dodalandı.
Gruziya parlamenti basshıları elimizde bolıp ótetuǵın Parlamentleraralıq awqamnıń 150-yubiley assamblesyasında qatnasıwǵa úlken qızıǵıwshılıq bildirip atırǵanı atap ótildi. Keleshekte de xalıqaralıq maydanda óz-ara qollap-quwatlaw ámeliyatın bekkemlewge kelisip alındı.

N.Abduraimova, ÓzA