Agentlik xızmetkerleri ministrliklerge, aymaqlarǵa barıp, anıq bir tarawdı tallap, mashqalalarǵa sheshim beriw ornına, qozǵatılǵan jınayat islerin sanaytuǵın qurı statist bolıp qalǵanı atap ótildi.

Agentlik basshıları korrupciya jaǵdayı eń kóp bolǵan rayonlıq densawlıqtı saqlaw, bántlik bólimi yamasa bank filialına barıp, jaǵdaydı úyrenbegeni, jańa zamanagóy sistema boyınsha usıns bermegeni kórsetip ótildi. Bul tarawlardıń tikkeley basshılarınıń óz sistemasın «korrupciyadan jıraq» etiw jumısları tómen ekeni sınǵa alındı.
Prezident tapsırması menen investiciyalıq baǵdarlamalar ústinen qadaǵalaw kúsheytilgeninen keyin ótken jıldıń ózinde 3 trillion sum ekonomlandı. Yamasa densawlıqtı saqlaw sistemasında «Situaciyalıq oray» iske qosılǵanınıń esabınan 2024-jılı 1,2 trillion sumlıq maqsetsiz qárejetlerdiń aldı alındı.
«Biraq, nege bul jumıslar Prezident tapsırma bergennen keyin baslanıwı kerek?», dep soraw berdi mámleketimiz basshısı.
Parlamenttegi byudjet komitetlerinde de hár jılı byudjetten eń kóp qarjı alatuǵın 3 ministrlikke barıp, korrupciyalıq faktorlardı anıqlawda hám ózgeris etiwde inta jetispey atırǵanı atap ótildi.

Qaraqalpaqstan xabar agentligi