Korrupciyanıń aldın alıw, faktorları menen islesiw ushın 117 ministrlik hám uyımlardaǵı «korrupciyaǵa qarsı ishki qadaǵalaw» strukturalarında 1 mıń 285 xızmetker jumıs islemekte. Biraq, korrupciyalıq faktorlardı saplastırıwda olardıń ornı da, juwapkershiligi de sezilmey atırǵanın atap ótti.

Hár jılı biznes ortalıǵın jaqsılaw, investiciyanı tartıw, jańa jumıs orınların jaratıwda byurokratiya hám tosqınlıqlardı saplastırıw boyınsha onlaǵan qararlar qabıl etilmekte.
Mısalı, 6,5 mıń túrdegi ónimdi islep shıǵarıw hám alıp kiriwde isbilermenlerge muwapıqlıqtı bahalaw juwapkershiligi júklengen. Sonnan 3 mıń 700 túrdegi tovar boyınsha hár bir partiyaǵa óz aldına sertifikat alıw shárt.
Bunday dizimler sanitariya, karantin, veterinariya uyımlarında da bar. Bajıxana bolsa bul dizimlerdiń hámmesi menen islesedi.
Isbilermenlerdi qıynap, korrupciyaǵa faktor bolıp atırǵan usınday dizimlerdi qısqartıw boyınsha bul uyımlardıń komplaens xızmetkerleri hesh qanday usınıs bermegen.