Jol háreketi qáwipsizligi inspektorları bodi-kamera menen xızmet etip atırǵanı, avtonomerler aukcionda satılıp atırǵanı, «qol radarı» hám qaǵazda bayanat dúziw biykar etilgeni ushın korrupciya faktorları keskin azaydı.

Bul haqqında Prezident Shavkat Mirziyoevtiń basshılıǵında korrupciyanıń aldın alıw boyınsha jumıslardıń nátiyjeliligi hám keleshektegi baslı wazıypalarǵa baǵıshlap ótkerilip atırǵan keńeytilgen májiliste málim etildi.
Xalıq hám isbilermenlerge «xalıq xızmetindegi mámleket» principi tiykarında xızmet kórsetiw jolǵa qoyıldı. Atap aytqanda, 120 túrdegi hújjetlerdi talap etiw, 160 dan aslam licenziya hám ruqsatnamalar biykar etildi.
Nátiyjede 200 mıńǵa shamalas jańa isbilermenler bazarǵa kirip keldi. Sırt el qatnasıwındaǵı kárxanalar derlik 5 esege artıp, 23 mıńǵa shamalastı. Еlektron mámleketlik xızmetler sanı 15 esege artıp, 721ge jetti, olardan paydalanıwshılar bolsa 11 millionnan astı.
– Aldıńǵı 25 jıl dawamında bul túsinikler bizge jat edi. Kórip kórmegenge alınatuǵın edi. Bulardıń hesh biri ózinen-ózi bolǵanı joq. Hámmesine mashaqatlı miynetimiz benen eristik. Eń áhmiyetlisi – bulardıń esabınan xalıq, isbilermenler, sırt el birge islesiwshilerimiz, xalıqaralıq shólkemler hám investorlardıń reformalarımızǵa isenimi bekkemlendi.
Sońǵı jeti jılda 120 milliard dollardan aslam investiciya kirgeni, ekonomikamız 2 esege ósip, ótken jılı 115 milliard dollarǵa jetkeni onıń anıq dáliyli emes pe, – dedi Prezident.

ÓzA