Usı kúnleri elimizdiń barlıq aymaqlarında, joqarı oqıw orınlarında, kitapxanalarda Ózbekstan xalıq shayırı, Zulfiyaxanım tuwılǵanınıń 110 jıllıǵı keńnen belgilenbekte.

Zulfiyaxanımnıń dóretiwshiligi hám jumısı, onıń atı menen shólkemlestirilgen Mámleketlik sıylıqtıń elimiz qızları turmısındaǵı ornı hám áhmiyeti haqqında Ózbekstan Respublikası Bas ministriniń orınbasarı – Shańaraq hám hayal-qızlar komitetiniń baslıǵı Zulayho Mahkamova tómendegi pikirlerdi bildirdi.
– Báhár – óziniń gózzallıǵı, sulıwlıǵı menen dúnyaǵa jańalanıw, quwanısh-shadlıq baǵıshlaytuǵın pasıl. Bul pasıl analarımız, qızlarımız, dilbar hayal-qızlarımızdıń bayramı menen, olardı húrmetlew menen baslanıwında, álbette, simvolikalıq máni bar. Sebebi, hayaldıń ózi báhár menen úylesikli bolıp tabıladı. Báhár pasılı hár jılı ullı shayırımız Zulfiya Israilovanıń tuwılǵan kúnin belgilew menen baslanıwı jıldan-jılǵa dástúrge aylanıp barmaqta.
Ózbekstan xalıq shayırı, belgili jámiyetlik ǵayratker, Javaoharlyal Neru atındaǵı xalıqaralıq sıylıqtıń iyesi, xalıqaralıq «Nilufar» sıylıǵınıń iyesi Zulfiya Israilovanıń basıp ótken ómir jolı, dóretiwshiligi hám ásirese, hár bir ózbek qızına, tek ǵana ózbek qızı emes, al pútkil shıǵıs qızlarına órnek bolatuǵın ruwxıy dúnyası, ádep-ikramlılıq tulǵası xalqımız tárepinen joqarı bahalanıp kelinbekte.
Zulfiyanıń talantı ulıwma elimiz ádebiyatında ayrıqsha hádiyse bolıp tabıladı. Tariyxıy táǵdir shıǵıs hayal-qızlarınıń hawazın dúnya minberine alıp shıǵıwdıń maqtanıshın hám qıyınshılıǵın Zulfiyaǵa júkledi. Bul juwapkershilik onıń dóretiwshilik shıńın hám turmıs tárizin belgiledi, belgili jámiyetlik ǵayratker, tınıshlıq hám xalıqlar doslıǵınıń jırshısı sıpatındaǵı ornın belgiledi.
Shayırdıń ómir jolı hám turmıstıń hár bir soqqılarında da opadarlıq hám sadıqlıq penen óz isenimine, xalqına sadıq qalǵanı shayırdı ruwxıy mártlik iyesi sıpatında ulıǵladı. Lirik shayır – Hamid Olimjon menen ótkergen qısqa ómiri, onnan ayırılıp qalıwı, ulıwma shayırdıń ómiri sadıqlıq hám opadarlıq tımsalı bolıp qaldı.

Hayal-qızlardı muqaddes biliw, olarǵa ayrıqsha húrmet kórsetiw, azat hám abat elimizdiń keleshegi bolǵan hár tárepleme jetik jaslardı tárbiyalawdaǵı sheksiz ornın jáne bir márte tán alıw, bárkamal, aqıllı hayal-qızlardıń áwladın kamalǵa keltiriw, olardıń arasındaǵı qábiletli jaslardıń ádebiyat, kórkem óner, ilim, bilimlendiriw hám mádeniyattı rawajlandırıwdaǵı jetiskenlikleri, zamanlaslarınıń milliy ǵárezsizlik ideyaları hám mádeniy-ruwxıy qádiriyatlarǵa iseniminiń artıwı jolındaǵı ibratlı jumısı, keń kólemli reformalardı jedellestiriwge belsene qatnasıwın xoshametlew maqsetinde 1999-jılı Ózbekstan Respublikası Prezidentiniń pármanı menen Zulfiya atındaǵı mámleketlik sıylıq shólkemlestirildi.
Házirge shekem elimizdiń júzlegen qábiletli, izleniwsheń hám intalı, belsendi qızları hár jılı báhárdiń dáslepki kúnlerinde usı joqarı sıylıq penen sıylıqlanadı. Zulfiya atındaǵı Mámleketlik sıylıq búgin elimiz qızlarınıń ólshemine, iygilikli ideyaların ámelge asırıw quralına aylandı.
Bul sıylıq elimiz qızlarınıń turmısında úlken jámiyetlik hádiyse boldı. Dúnyanıń hesh bir mámleketinde bunday qábiletli qızlarǵa mámleket ǵamqorlıǵınıń nıshanı bolǵan sıylıq bolmaǵan.
Zulfiya atındaǵı mámleketlik sıylıq 2000-jıldan berli qábiletli qızlarǵa bilimlendiriw, ilim, ádebiyat, mádeniyat, kórkem óner, sport, málimleme texnologiyaları tarawları hám jámiyetlik jumıslardaǵı ayrıqsha jetiskenlikleri ushın berilip kelinbekte. Usı waqıtqa shekem 452 hayal-qız bul sıylıqtı alıwǵa miyasar boldı.
Bizge belgili, bıyıl Zulfiyaxanımnıń 110 jıllıq tuwılǵan kúni xalqımız tárepinen eń shetki awıllarda da belgilenbekte hám bul quwanısh dawam etpekte.
Zulfiya dóretiwshiligi mıńlaǵan adamlarǵa muhabbat hám sadıqlıqtan sabaq bermekte, sadıqlıq hám opadarlıq tımsalı bolıp jasamaqta. Ayqulaq jeti reńde jetpis túrli jılwalanıp, hámmeni ashıq etkenindey Zulfiya tańnıń ózindey ıras hám jarqın haqıyqatqa suwǵarılǵan poeziyası menen sadıqlıq hám opadarlıq sezimin adamgershilik, jetiskenliktiń baslı norması dárejesine kótergen.
Xalqınıń dárti menen kúyip janǵan insanlar adamlardıń qálbine óz esteliklerin, tulǵaların ornatıp ketedi. Bul estelikti umıtıwǵa da, kewillerden alıp taslawǵa da bolmaydı. Olardı hár eslegende júregimiz túbindegi eń shiyrin estelikler qayta jańlanadı. Zulfiyaxanım da adamlardıń qálbine óz tulǵasın hám esteligin ornatıp ketken ullı shayır, aǵartıwshı, sadıqlıqta teńsiz ózbek hayalı edi. Ol báhár sıyaqlı hár qashan qálbimizge jaqtılıq hám nur taratıp kirip kele beredi.
Álbette, shańaraq jumısları, perzent tárbiyası menen birge, hár qıylı tarawlarda pidákerlik penen xızmet etip atırǵan apa-sińlilerimizdiń miynetin múnásip qádirlew bárqulla mámleket itibarında.
Prezidentimiz Shavkat Mirziyoev tárepinen keyingi jıllarda hayal-qızlardıń bilim alıwına ayrıqsha itibar qaratılmaqta. Elimizde joqarı maǵlıwmatlı qızlardıń qatarın keńeytiw maqsetinde bir qatar imkaniyatlar, jeńillikler hám sharayatlar jaratılmaqta. Házirgi kúnde joqarı oqıw orınları studentleriniń 52 procentinen zıyatın hayal-qızlar quramaqta. Magistraturada oqıp atırǵan studentlerdiń arasında qızlardıń úlesi derlik 62 procentti yamasa 25 mıńdı quramaqta.
Sebebi hayal-qızlardıń, atap aytqanda, qız balanıń oqıp, joqarı maǵlıwmatlı bolıwı, kásip-óner iyelewi shańaraqtıń baxtı, perzentlerdiń kamalǵa keliwi ushın, sol tiykarda pútkil jámiyettiń rawajlanıwına xızmet etedi. Sebebi, qızlarımızdı oqıtıw, olardıń qandayda bir kásip iyesi bolıwı jámiyettegi bir qansha mashqalalarǵa qarsı gúresiw ushın durıs jol esaplanadı. Shańaraqlıq ajırasıwlardıń aldı alınıwı, erte turmıs, erte tuwıwshılıq, tuwısqanlar arasındaǵı neke hám basqalar ushın ilim eń aqıllı sheshim bola alıwı múmkin.
Bir qızdı oqıtıw arqalı Watanımızdıń rawajlanıwı ushın múnásip perzentler tárbiyalay alatuǵın analardıń qatarın keńeytiwge álbette, múnásip úles qosqan bolamız.

ÓzAnıń xabarshısı
N.Usmanova jazıp aldı.