8-mart – Xalıqaralıq hayal-qızlar kúni múnásibeti menen usı jıl 3-10 mart kúnleri elimizde «Hayal-qızlarǵa húrmet» hápteligi ótkeriledi.

Háptelik sheńberinde hayal-qızlardı qollap-quwatlaw, olardıń huqıqları menen nızamlı máplerin qorǵaw, ekonomikalıq, sociallıq hám siyasiy belsendiligin arttırıw, bántligin támiyinlew, isbilermenlikke keńnen tartıw, mútáj hayal-qızlardı sociallıq qollap-quwatlawǵa qaratılǵan keń kólemli ilajlar, reformalardıń ámeliy nátiyjelerin ózinde jámlegen media-tańlawlar hám ilajlar ótkeriw názerde tutılǵan.
Sonday-aq, jámiyetlik hám mámleketlik turmısta belsendilik hám intalılıq kórsetken, óziniń nátiyjeli miyneti menen jámiyettiń rawajlanıwına múnásip úles qosıp atırǵan hayal-qızlardı «Mwytabar ayol» kókirek belgisi menen sıylıqlaw máresimleri shólkemlestiriledi.
Uzaq jıllar ministrlik hám uyımlarda miynet etip pidayılıq, watan súyiwshilik, ibrat úlgisin kórsetken nuranıy analarımız, «Hayal-qızlar dápteri» hám «Jaslar dápteri»ne kirgizilgen hayal-qızlardıń «Jańa Ózbekstan baǵı» hám muzeyler, estelikler, zıyarat orınları, teatr, koncert, kino, tariyxıy hám kewilashar orınlarına jeńillikli tiykarda saparları shólkemlestirilmekte.
Hayal-qızlardı qollap-quwatlaw, olardıń jámiyetlik belsendiliklerin arttırıwǵa qaratılǵan hár qıylı kitap hám maqalaların tanıstırıw bolıp ótedi. Bunnan tısqarı ulıwma bilim beriw mektepleriniń oqıwshıları arasında «Ana – shańaraǵımız tımsalı, miyrim bulaǵı» temasında jazba jumıs tańlawın ótkeriw názerde tutılǵan.
Sociallıq tarmaqlarda jaslardıń qatnasıwında «Hayaldı húrmetlew – jaqsılıq hám ádillik norması», «Ana – miyrim bulaǵı», «Men anam menen maqtanaman», «Elimizdiń rawajlanıwında meniń úlesim» atamalarında fleshmob hám chellendjler shólkemlestiriledi.

Muhayyo Toshqoraeva,
ÓzAnıń xabarshısı