Tábiyǵıy gaz ushın ısıtıw máwsiminde belgilengen norma 1-aprelge shekem sozdırıldı. Bul haqqında Еnergetika ministrligi rásmiy telegramm-kanalında xabar berildi.

Atap ótiliwinshe, 1-mart sánesinen baslap mámleketimizde ısıtıw máwsiminde tábiyǵıy gaz ushın engizilgen 500 kubometrlik bazalıq norma 100 kubometrge túsiriliwi belgilengen edi.
Biraq mart ayında hawa temperaturasınıń tómen bolıwı, hátteki ayırım kúnleri keshqurın hám kúndizgi temperatura 0 gradus dárejeden túsip, ádettegige qaraǵanda suwıǵıraq bolıwı kútilip atırǵanı, qalaberdi, xalıqqa qolaylıq jaratıw maqsetinde, Mámleketimiz basshısınıń tapsırmasına muwapıq, Ministrler Kabinetiniń tiyisli qararı menen ısıtıw máwsimi ushın belgilengen 500 kubometr bazalıq norma 2025-jıldıń 1-apreline shekem sozdırıldı, delinedi xabarda.

Qaraqalpaqstan xabar agentligi