Milliy qosıqshılıq ónerimizdiń ǵayratlı úgit-násiyatlawshısı, Ózbekstan xalıq artisti Ǵulamjan Yoqubov óziniń yoshlı qosıqları, ózine tán atqarıw usılı menen tamashagóylerdiń itibarına erisken. Usı kúnlerde kórkem óner iyesi qutlı 75 jasın qarsı almaqta.

Paytaxtımızdaǵı «Xalıqlar doslıǵı» kórkem óner sarayında Ózbekstan hám Qaraqalpaqstan xalıq artisti Ǵulamjan Yoqubovtıń tuwılǵan sánesi múnásibeti menen úlken koncert baǵdarlaması bolıp ótti.
Ózbekstan Respublikası Prezidenti Shavkat Mirziyoevtiń «Ózbekstan xalıq artisti Ǵulamjan Yoqubovtı sıylıqlaw haqqında»ǵı pármanın Ózbekstan Respublikası Prezidentiniń keńesgóyi Xayriddin Sultonov oqıp esittirdi. Oǵan bola, Ǵulamjan Yoqubov milliy qosıqshılıq ónerimizdi rawajlandırıw baǵdarındaǵı xızmetleri, jámiyetlik turmısta belsene qatnası ushın “Buyuk xizmatlari uchun” ordeni menen sıylıqlandı.
Usı sıylıqtı kórkem óner iyesine Ózbekstan Respublikası Oliy Majlisi Senatı Baslıǵı Tanzila Norboeva tapsırdı.
Ǵulamjan Yoqubov 60 jıldan berli kórkem óner jolında xızmet etip kelmekte. Ol 45 jıldan aslam Ózbekstan filarmoniyasında miynet etip, xalqımız ushın unaytuǵın qosıqlar dóretti. Onıń qosıqları búgin mámleketimiz aymaǵınan uzaqlarda da jańlamaqta.
Muzıkalı keshede shıǵıp sóylegen Ózbekstan Qaharmanı, Ózbekstan hám Qaraqlapaqstan xalıq artisti Munojat Ywlchieva, Ózbekstan xalıq shayırı Mahmud Toir, Ózbekstan xalıq artisti Farrux Zokirov Ǵ.Yoqubovtıń ózine tán dóretiwshilik jolı haqqında hár tárepleme pikir bildirdi.
-Ǵulamjan qaysı dógerekke kirse, sol ortalıqqa, álbette, payız kiredi, – dedi Ózbekstan xalıq artisti Farrux Zokirov. – Onıń ádep-ikramlılıǵı, qarım-qatnas mádeniyatı, saxna mádeniyatı, tamashagóylerge húrmeti jaslarǵa úlgi bolıp esaplanadı. Prezidentimizdiń kórkem ónerdiń rawajlanıwına kórsetip atırǵan sheksiz itibarı Ǵulamjan Yoqubov miynetleriniń usınday joqarı tán alınǵanında kórindi.
Sheber kórkem óner iyesi milliy klassikalıq hám estradalıq baǵdardaǵı qosıqlardı da atqaradı. Ol 1985-jılı «Melodiya» dóretiwshilik firmasınıń «Altın disk» sıylıǵı menen sıylıqlanǵan. Ǵárezsizlik jıllarında sheber kórkem óner iyesi «Dwstlik», «Еl-yurt hurmati» ordenleri menen sıylıqlanǵan.
– Kórkem óner jolındaǵı miynetlerim usınday bahalanǵanınan oǵada quwanıshlıman, – dedi Ǵ.Yoqubov. – Xalqımızǵa biytákirar qosıqlar dóretiw jolında bunnan bılay da kúsh-ǵayratımdı ayamayman.
Saltanatlı muzıkalıq keshede Watandı, miyrim-shápáát, sadıqlıq hám gózzalıqtı jırlawshı qosıqlar jańladı.

Nazokat USMONOVA, ÓzA