Qazaqstan menen ónim almasıwdıń kólemin keńeytiw maqsetinde Ózbekstan tárepi tórt qosımsha sawda koridorın ashıwdı rejelestirmekte.

Bul baslamanı respublikamızdıń usı qońsılas mámlekettegi Ayrıqsha hám tolıq huqıqlı elshisi Baxtiyor Ibrohimov Jetisuw wálayatınıń isbilermenleri menen ushırasıw barısında málim etti.
Diplomatiyalıq missiyamız basshısı Ózbekstan tárepi alǵa qoyıp atırǵan, mámleketlerimiz arasındaǵı ekonomikalıq baylanıslardı rawajlandırıwǵa qaratılǵan isler haqqında tolıq maǵlıwmat berdi. Atap aytqanda, házirgi kúnde mámleket shegarası qadaǵalaw-ótkeriw mánzillerinde aǵımdaǵı ońlaw jumısları alıp barılıp atırǵanı atap ótildi. Sebebi, bunday ilajlar tovar aylanısınıń ósimine tikkeley úles qosadı.
Házir elimizde Qazaqstan kapitalınıń qatnasıwındaǵı mıńnan aslam kárxana tabıslı jumıs alıp barmaqta. Eki mámlekettiń ekonomikalıq qatnasıqları regionlararalıq baylanıslardı bekkemlew procesine de tikkeley unamlı tásir etetuǵınlıǵın atap ótiw kerek.
Ótken jılı Qazaqstan hám Ózbekstan jámi 4,2 milliard dollarlıq tovar hám xızmet almasqan. Esap beriw dáwirinde elimizden qońsılas elge 1,4 milliard dollarlıq ónim eksport etilgen.

G.Sattarova, ÓzA