Berdaq atındaǵı Qaraqalpaq ádebiyatı tariyxı mámleketlik muzeyinde xalqımızdıń súyikli shayırlarınıń biri Ayapbergen Muwsaevtıń 145 jıllıǵına baǵıshlanıp, «Jeti asırımda jırlanǵan táriyp qosıq-Qaraqalpaqta» atamasında ádebiy saz-sáwbetli keshe bolıp ótti.

Keshege respublikamızǵa belgili ilimpazlar, shayır-jazıwshılar, student-jaslar hám keń jámiyetshilik wákilleri qatnastı.
Kesheni muzey direktorı Shárigúl Payzullaeva ashtı hám basqarıp bardı.
Ilajda tariyx ilimleriiniń kandidatı, docent J.Aytmuratov «A.Muwsaev shıǵarmalarında tariyxıy derekler», Berdaq atındaǵı Qaraqalpaq mámleketlik universitetiniń qaraqalpaq ádebiyatı kafedrası izleniwshisi Abdiǵafur Hamzeev, «A.Muwsaev shıǵarmalarında xalıqlıq dástúr, úrp-ádetler kórinisi», filologiya ilimleriniń doktorı T. Masharipova «A.Muwsaev shıǵarmaların jaslar arasında keńnen úgit-násiyatlawdıń áhmiyeti», shayırdıń aqlıǵı Kamila Ayapbergenova «A.Muwsaevtan ónip-ósken áwladlar» degen temalarda bayanatlar jasap, shayırdıń ómiri hám dóretiwshiligi, qaraqalpaq ádebiyatı hám tariyxında tutqan ayrıqsha ornı haqqında ilaj qatnasıwshılarına keń túrde maǵlıwmatlar berdi.
Sonday-aq, keshede A.Muwsaev tárepinen dóretilgen «Qaraqalpaqta» qosıǵın Túrkiya Respublikası saxnalarında atqarıp, búgingi kúni xalqımızdıń alǵısına bólenip júrgen túrkiyalı xosh hawaz qosıqshı Feryal Bashel Tuzun onlayn túrde qatnasıp, ilaj qatnasıwshılarına sálem jolladı hám «Qaraqalpaqta» qosıǵın janlı hawazda aytıp berdi.
Qızıqlı ótken ádebiy saz-sáwbetli keshe respublikamızǵa belgili kórkem óner sheberleri hám jas atqarıwshılar tárepinen tayarlanǵan yoshlı koncert baǵdarlaması menen dawam etti.

Adilbay Orazov,
Qaraqalpaqstan xabar agentliginiń sholıwshısı.