Keshe Tashkent qalasında Ózbekstan Respublikası ushın «CT TECH+» baǵdarlaması menen tanıstırıw máresimi bolıp ótti. Evropa Awqamı tárepinen qarjılandırılıp atırǵan bul baǵdarlama Birlesken Milletler Shólkeminiń «Kiberqáwipsizlik hám rawajlanıp atırǵan texnologiyalar boyınsha globallıq terrorizmge qarsı gúres» baǵdarlaması kóleminde ámelge asırılmaqta.

Ilajdan gózlengen maqset Ózbekstan ushın «CT TECH+» baǵdarlamasın rásmiy túrde usınıw, sonday-aq, 2025-2026-jıllarǵa mólsherlengen ilajlar rejesin kelisiwden ibarat.
Ilaj Birlesken Milletler Shólkeminiń Terrorizmge qarsı basqarması janındaǵı Terrorizmge qarsı gúresiw orayı hám Xalıqaralıq jınayat policiyası (Interpol) shólkemi tárepinen Ózbekstan Respublikası Prezidenti janındaǵı Strategiyalıq hám regionlararalıq izertlewler institutı jáne Ózbekstan Respublikası Ishki isler ministrligi Akademiyası járdeminde shólkemlestirildi.
Ilajda mámleketlik uyımlar, huqıq qorǵaw uyımları, ilimiy toparlar hám jeke menshik sektordıń wákilleri qatnastı.
«CT TECH+» baǵdarlaması terrorizmge qarsı gúresiwge qaratılǵan milliy strategiyalardı bekkemlew, huqıq qorǵaw uyımlarınıń texnologiyalıq imkaniyatların arttırıw hám jańa texnologiyalardan paydalanıw menen baylanıslı terrorshılıq qáwiplerge qarsı gúresiwde xalıqaralıq birge islesiwdi rawajlandırıwǵa qaratılǵan.
Baǵdarlama qánigelerdi jasalma intellekt, ashıq derek razvedkası (OSINT), sonday-aq, kiberterrorizm hám darknettegi nızamsız operaciyalarǵa qarsı gúresiw boyınsha oqıtıwdı óz ishine aladı.
Tanıstırıw máresiminiń rásmiy baǵdarlamasınan Birlesken Milletler Shólkemi, Evropa Awqamı hám Ózbekstan Respublikası wákilleriniń shıǵıp sóylewleri, kiberqáwipsizlik tarawındaǵı globallıq hám regionallıq mashqalalardı dodalaw, sonday-aq, «CT TECH+» sheńberinde óz-ara birge islesiw strategiyaların islep shıǵıw orın aldı.

ÓzA