Jámiyette ushırasıp atırǵan mashqalalar, kemshiliklerdi saplastırıw boyınsha parlament qadaǵalawınan tısqarı senator sorawı institutı da jolǵa qoyılǵan.

Mektepke shekemgi bilimlendiriw sistemasında salamat báseki ortalıǵın qáliplestiriw hám balalardıń mektepke shekemgi bilimlendiriw menen qamtılıwın arttırıw maqsetinde mámleketlik emes mektepke shekemgi bilimlendiriw shólkemleriniń jumısı qollap-quwatlanıp, olarǵa bir qatar jeńillikler berildi. Nátiyjede házirgi kúnde 38 mıń 58 mektepke shekemgi bilimlendiriw shólkemi jumısı jolǵa qoyılǵan. Sonnan 31 mıń 139 ın mámleketlik emes mektepke shekemgi bilimlendiriw shólkemleri quraydı. Házirgi waqıtta bul mámleketlik emes mektepke shekemgi bilimlendiriw shólkemlerine 946 mıń 540 bala qamtap alınǵan.
Tarawda unamlı nátiyjeler menen birge ayırım mashqalalar payda bolmaqta. Máselen, sociallıq tarmaqlarda tarqalıp atırǵan xabarlar arqalı ayırım mektepke shekemgi bilimlendiriw shólkemlerinde balalarǵa zorlıq jaǵdayları júz berip atırǵanlıǵın kóriw múmkin.
Konstituciyanıń 26-statyasında hesh kim qıynawǵa salınıwı, zorlıqqa, basqa da ayawsız, insanıylıqqa jat yamasa insan qádirin kemsitiwshi qatnasqa yamasa jazaǵa tartılıwı múmkin emes, dep belgilengen. 78-statyaǵa bola, balalıq mámleket tárepinen qorǵaladı.
Sonnan kelip shıǵıp, Senattıń Ilim, bilimlendiriw hám densawlıqtı saqlaw máseleleri komitetiniń baslıǵı Bahrom Abdullaev Ózbekstan Respublikası mektepke shekemgi hám mektep bilimlendiriwi ministrine senator sorawın jiberdi.
Sorawda ayırım mámleketlik emes mektepke shekemgi bilimlendiriw shólkemlerinde balalarǵa zorlıq jaǵdaylarınıń júz berip atırǵanlıǵı atap ótildi. Atap aytqanda, Tashkent qalası Mırza Ulıǵbek rayonındaǵı «Tanzilandiya» mámleketlik emes mektepke shekemgi bilimlendiriw shólkeminiń tárbiyashıları tárepinen usı shólkem tárbiyalanıwshılarına zorlıq háreketleri júz bergeni, Yunusabad rayonındaǵı «First Daycare» mámleketlik emes mektepke shekemgi bilimlendiriw shólkeminiń tárbiyashısı hám tárbiyashı járdemshisiniń balalardan birin awqat jemegeni ushın stulǵa skochlap qoyǵanı anıqlandı.
Usınday unamsız jaǵdaylardıń kóbeyiwi mektepke shekemgi bilimlendiriw shólkemleri, sonıń ishinde, mektepke shekemgi bilimlendiriw shólkemlerinde balalarǵa kórsetilip atırǵan tálim-tárbiya xızmetleri hám olarǵa jaratılǵan sharayatlardı monitoring etiw qanaatlandırarsız jolǵa qoyılǵanın kórsetpekte. Bunday jaǵdaylar basqa mektepke shekemgi bilimlendiriw shólkemlerinde júz bermey atırǵanına hesh kim kepillik bere almaydı.
Senator ministrden mektepke shekemgi bilimlendiriw shólkemleri, sonıń ishinde, mámleketlik emes mektepke shekemgi bilimlendiriw shólkemlerinde balalarǵa islenip atırǵan zorlıq jaǵdaylarınıń sebepleri hám olardıń aldın alıw boyınsha kórilip atırǵan ilajlar haqqında túsinik beriwdi soradı.

N.Abduraimova, WzA