Mámleketimiz basshısı tárepinen jalpı ishki ónim kólemin 2030-jılda 200 milliard dollarǵa alıp shıǵıw wazıypası belgilep berildi.

Senatta ótkerilgen seminarda usı máselege itibar qaratıldı. Byudjet hám ekonomikalıq máseleler komiteti tárepinen ótkerilgen seminarda «2025-jıl ushın Ózbekstan Respublikasınıń Mámleketlik byudjet haqqında»ǵı nızamınıń orınlanıwı boyınsha ámelge asırılatuǵın ilajlar hám respublikalıq hám jergilikli byudjetler arasındaǵı qatnasıqlar dodalandı.
Atap ótilgenindey, Mámleketlik byudjettiń 2025-jıl ushın parametrleri, byudjet jetispewshiligi dúnya ekonomikasındaǵı anıqsızlıq hám geosiyasiy jaǵdaydıń mámleketimizdiń ekonomikasına tásirin jumsartıw hám sociallıq qorǵawǵa mútáj xalıqtı mámleket tárepinen qollap-quwatlawdı jáne de kúsheytiw sıyaqlı faktorlardı itibarǵa alǵan halda esap-sanaq etilgen.
Seminarda aldınǵı jıllardan ózgeshe túrde «2025-jıl ushın Ózbekstan Respublikasınıń Mámleketlik byudjet haqqında»ǵı nızamına bir qatar jańa normalar kirgizilgeni haqqında tolıq túsinik berildi.
Atap aytqanda, nızamda mámleketlik medicinalıq qamsızlandırıw mexanizmleri engizilgen aymaqlarda tiyisli rayon hám qalalar byudjetleriniń rezerv qorları usı mexanizmler engizilgen jıldan aldınǵı jıldaǵı kólemnen az bolmaǵan muǵdarda qáliplestiriliwi belgilengen.
Onda, mámleketlik medicinalıq qamsızlandırıw mexanizmleri enigizilgen aymaqlarda qosımsha qarjılardı qáliplestiriw tiyisli joqarı turatuǵın byudjetlerdiń rezerv qorları qarjıların azaytıw esabınan ámelge asırılıwı názerde tutılǵan. Sonıń menen birge, usı jıldan baslap jergilikli keńeslerdiń wákillikleri de keńeygen.
Qaraqalpaqstan Respublikası Joqarǵı Keńesi, wálayatlar hám Tashkent qalası xalıq deputatları keńeslerine rayon hám qalalardıń ekonomikalıq rawajlanıw dárejesine kelip shıǵıp jeke tártiptegi isbilermenler ushın qatań salıq stavkaları muǵdarın belgilew wákilligi berilgen.
2025-jıldan olarǵa suw salıǵı stavkasına 0,7 ge shekem azaytıwshı hám 1,5 ǵa shekem arttırıwshı koefficient qollanıw sıyaqlı bir qatar jańa wákillikler berilip, rayon (qala)lardıń jergilikli byudjetlerinde qaldırılatuǵın dáramatlardıń quramı keńeytilgen.
Seminar juwmaǵında qatnasıwshılarǵa zárúr usınıslar berildi.

N.Abduraimova, ÓzA