Ózbekstan Respublikası Prezidenti Shavkat Mirziyoev 27-fevral kúni abıraylı “Úlken dubılǵa” xalıqaralıq turniri sheńberinde mámleketimizde bolıp turǵan Xalıqaralıq dzyudo federaciyası basshısı Marius Vizerdi qabılladı.

Bul iri sport shólkemi menen mámleketimizde dzyudo mektebin rawajlandırıw hám usı jeke gúres túrin ǵalaba en jaydırıw boyınsha nátiyjeli birge islesiwdi jáne de keńeytiw máseleleri kórip shıǵıldı.
Ózbekstan xalıqaralıq federaciya jumısında belsene qatnasıp atırǵanın atap ótiwimiz kerek. 2022-jılı mámleketimizde úlken jastaǵılar arasında jáhán chempionatı, ótken jılı áskeriy xızmetkerler arasında jáhán birinshiligi tabıslı ótkerildi. Parij qalasında bolıp ótken jazǵı Olimpiada oyınlarında Diyora Keldiyorova Ózbekstan tariyxında birinshi ret dzyudo boyınsha altın medaldı qolǵa kirgizdi.
Federaciya basshısı Marius Vizer mámleketimizde salamat turmıs tárizin ǵalaba en jaydırıw hám sporttıń barlıq túrlerin hár tárepleme qollap-quwatlaw, jaslar, ásirese, qızlardı keńnen tartıw, zamanagóy sport infrastrukturasın jaratıw boyınsha ámelge asırılıp atırǵan keń kólemli reformalardı joqarı bahaladı.
Ushırasıwda sportshılar, trenerler hám tóreshilerdi tayarlawda federaciyanıń texnikalıq hám ekspert járdemin keńeytiw, qábiletlilerdi tańlap alıwdıń nátiyjeli mexanizmin engiziw máselelerine ayrıqsha itibar qaratıldı.
Bunnan tısqarı, mámleketimiz aymaqlarında dzyudo boyınsha xalıqaralıq jarıslardı turaqlı túrde ótkerip barıw usınısı bildirildi.
Ushırasıw juwmaǵında Ózbekstan Prezidenti milliy dzyudo mektebin rawajlandırıwǵa qosqan úlken úlesi ushın Xalıqaralıq dzyudo federaciyası basshısı Marius Vizerge mámleketimizdiń joqarı sıylıǵı –“Dwstlik” ordenin tapsırdı.

ÓzA