Oliy Majlis janındaǵı Puqaralıq jámiyeti institutların qollap-quwatlaw jámiyetlik qorı qarjıların basqarıw boyınsha Parlament komissiyasınıń májilisi bolıp ótti.

Atap ótiw kerek, «Ózbekstan – 2030» strategiyası, 2021-2025-jıllarda puqaralıq jámiyetin rawajlandırıw koncepciyasınıń orınlanıwın támiyinlew maqsetinde Ózbekstan Respublikası Prezidentiniń 2024-jıl 26-avgusttaǵı pármanı menen Oliy Majlis janındaǵı Puqaralıq jámiyeti institutların qollap-quwatlaw jámiyetlik qorı qayta shólkemlestirilgen edi.
Usı párman menen Jámiyetlik qor qarjıların basqarıw boyınsha Parlament komissiyası hám Jámiyetlik qordıń aldına puqaralıq jámiyeti institutların mámleket tárepinen jańasha sistemada qollap-quwatlawǵa qaratılǵan áhmiyetli wazıypalar belgilep berilgen.
Májiliste Jámiyetlik qordıń 2024-jılǵı jumısı tallanıp, usı jıldaǵı jumısınıń áhmiyetli baǵdarları dodalandı. Atap ótiliwinshe, bıyıl puqaralıq jámiyeti institutların mámleket tárepinen qollap-quwatlawdıń jańasha sisteması engizilmekte. Máselen, Parlamentlik komissiya aǵzaları hám Jámiyetlik qordıń wákillerinen ibarat jumısshı topardıń aymaqlarǵa barıp, xalıq penen sóylesiwler shólkemlestirgen halda olardıń mútájliklerin úyrenip, mashqalalardıń mánzilli hám nátiyjeli sheshimine qaratılǵan tańlawlardı járiyalaw rejelestirilmekte.
Tańlawlardıń ashıq-aydınlıǵı hám processleriniń operativliligin támiyinlew maqsetinde bolsa mámleketlik sociallıq buyırtpa hám grantlardı ajıratıw menen baylanıslı barlıq processler ngo.gov.uz birden-bir elektron platformasında ámelge asırıladı.
Endi, bul platforma arqalı talaban shólkemniń joybardı tapsırıwı, Parlament komissiyası tárepinen kórip shıǵıw hám bahalaw processlerin baqlap barıw, sóylesiwlerge bolsa tikkeley qatnasıw imkaniyatı da bar.
Sonday-aq, 2024-jıl 1-oktyabrden baslap 2027-jıl 1-oktyabrge shekem Jámiyetlik qordıń qarjıları esabınan ámelge asırılatuǵın joybarlar sheńberinde miynetke haqı tólew boyınsha belgilengen salıq stavkaları 50 procentke, 2025-jıl 1-yanvardan mayıplıǵı bolǵan shaxslar, veteranlar, hayal-qızlar jáne balalar jámiyetlik birlespelerdi mámleketlik dizimnen ótkeriw ushın belgilengen másleketlik bajılardıń muǵdarı eki esege azaytıldı. Jámiyetlik fondtıń Qaraqalpaqstan Respublikası, wálayatlar hám Tashkent qalasındaǵı óz aldına bólimleri shólkemlestirlidi. «Puqaralıq baslaması» milliy sıylıǵı, dástúriy «Altın qálem» tańlawında puqaralıq jámiyeti institutlarınıń jumısın sáwlelendiriw baǵdarında jańa nominaciya shólkemlestirilmekte.
Májilis juwmaǵında Parlament komissiyası tárepinen «Ózbekstan – 2030» strategiyası, 2021-2025-jıllarda puqaralıq jámiyetin rawajlandırıw koncepciyası, «Qorshaǵan ortalıqtı qorǵaw hám «jasıl» ekonomika jılı» Mámleketlik baǵdarlamada názerde tutılǵan wazıypalardı ámelge asırıwda áhmiyetli baslama hám joybarlardı qollap-quwatlawǵa qaratılǵan bir qatar baǵdarlamalar qabıl etildi.

N.Rahmanova, ÓzA