Ájiniyaz atındaǵı Nókis mámleketlik pedagogikalıq institutınıń baspasóz xızmeti tárepinen respublikalıq hám jergilikli ǵalaba xabar qurallarınıń wákilleri, jurnalistler hám blogerler ushın instituttaǵı oqıw laboratoriyalarına hám usxanalarına media-tur shólkemlestirildi.

Institutta házirgi waqıtta 10 fakultet, 2 bólim, 32 kafedra bolıp, ulıwma 26 bakalavr tálim baǵdarı hám 19 magistratura qánigeliginde 17 mıńnan aslam jaslar bilim almaqta.
Búgingi kúnde pedagogikalıq institutta 600 ge shamalas tájiriybeli professor-oqıtıwshılar studentlerge tálim-tárbiya berip kelmekte. Olardan 233 oqıtıwshı ilimiy dárejege iye bolıp, 2024-jılda 7 ilim doktorı (DSc), 30 filosofiya doktorı (PhD) dissertaciya jumısı qorǵaldı. Házirgi waqıtta instituttıń ilimiy potencialı 40 procentti quraydı.
Institutta studentlerdiń teoriyalıq bilimlerin bekkemlew hám ámeliy kónlikpelerin arttırıw arqalı maman kadrlar bolıp jetisiwi ushın barlıq sharayatlar jaratılǵan.
Ilaj qatnasıwshıları dáslep instituttıń Texnologiyalıq tálim kafedrasınıń oqıw ustaxanasına alıp barıldı. Bul oqıw-ustaxanası Ózbekstan Respublikası Ministrler Kabinetiniń 2018-jıl 22-noyabrdegi «Islam rawajlanıw bankiniń qatnasıwında «Joqarı bilimlendiriw mákemeleriniń texnikalıq bazasın bekkemlew» joybarın ámelge asırıw ilajları haqqında»ǵı qararınıń orınlanıwı sheńberinde jámi 70 mıń AQSh dollarına shamalas qarjı esabınan zamanagóy ásbap úskeneler menen támiyinlendi.
Oqıw ustaxanasınıń aspazlıq, temirdi qayta islew, aǵashtı qayta islew, tigiwshilik sıyaqlı bólmelerinde studentler teoriyalıq bilimlerin ámeliyat penen bekkemlemekte. Bul jerde oqıw hám ámeliyat sabaqlarınan tısqarı, studentler ushın dógerek jumısları da alıp barıladı. 100 den aslam studentler usı dógereklerde bos waqıtların nátiyjeli ótkermekte. Házirgi waqıtta ustaxanada robototexnika boyınsha ámeliyat bólmesin shólkemlestiriw jumısları kórip shıǵılmaqta.
Tábiyǵıy pánler fakulteti biologiya tálim baǵdarında bilim alıp atırǵan studentler ushın shólkemlestirilgen oqıw laboratoriyası media-turdıń ekinshi mánzili boldı.
Bul jerde studentler, magistrantlar, doktorantlar hám professor-oqıtıwshılardıń laboratoriyalıq jumısların alıp barıwı ushın Islam rawajlanıw banki qarjıları esabınan 592 million sum, sonday-aq, 27 mıń AQSh dolları muǵdarındaǵı eń sońǵı zamanagóy laboratoriyalıq texnikalar hám ásbap-úskeneler alıp kelindi.
– Men instituttıń biologiya tálim baǵdarınıń 4-kursında oqıp atırman. Búgin laboratoriyada balıqlardıń túrleri, olardıń dúzilisi boyınsha ámeliy sabaq ótilmekte. Laboratoriya barlıq kerekli zamanagóy úskeneler menen támiyinlengeni, usınday ámeliy sabaqlardı ótkenimizde úlken paydasın tiygizip atır. Házirgi waqıtta men sobıqlı eginler boyınsha ilimiy jumıs penen de shuǵıllanıp atırman. Ámeliyatta hám ilimiy jumısımda laboratoriyadaǵı múmkinshiliklerden de keńnen paydalanıp atırman,-deydi Qumar Masuatdinova.
Media-tur qatnasıwshıları instituttıń 90 jıllıǵı qarsańında paydalanıwǵa tapsırılǵan jańa oqıw imaratında da bolıp, bul jerde Fizika-matematika fakultetiniń mexanika, molekulyarlıq fizika, optika, elektromagnetizm, atom hám elementar bóleksheler fizikası, fizikanı oqıtıw metodikası sabaqlarına arnalǵan laboratoriya xanaları menen tanıstı.
Fakultettegi laboratoriya bólmeleri 2019-jılı Germaniya Federativ Respublikasınıń «LD Didactic GmbH» kompaniyası tárepinen alıp kelingen ásbap-úskeneler menen támiyinlengen bolıp, professor-oqıtıwshılar laboratoriya sabaqların belgilengen grafik tiykarında ótip, joqarı nátiyjelerge erisip kelmekte. Házirgi waqıtta fakultette atom hám elementar bóleksheler fizikası, astronomiya hám astrofizika pánlerinen laboratoriyalıq jumıslar ushın paydalanatuǵın ásbap-úskenelerdi alıp kelip ornatıw boyınsha ámeliy jumıslar alıp barılmaqta.

Bunnan soń ǵalaba xabar quralları wákilleri instituttıń IT-inkubaciya orayınıń jumısları menen de tanıstı. Bul oray studentler ushın joqarı texnologiyalı startap joybarlardı islep shıǵıw ushın platforma bolıp, studentler ushın hár qıylı konsultaciyalar, jarıslar, xakaton hám seminarlar shólkemlestiriledi. IT-inkubaciya orayı jaslarǵa baslanǵısh ekosistema haqqında tiykarǵı hám fundamental bilimlerdi beriw menen birge, olarǵa ózlerin málimleme texnologiyaları tarawında isbilermen sıpatında kórsetiwge kómeklesedi.
Media-tur dawamında jurnalistler hám jámiyetshiliktiń belsendi aǵzalarına oqıw laboratoriyaları menen birgelikte ilimiy laboratoriyalardıń jumısların jolǵa qoyıw baǵdarındaǵı islenip atırǵan jumıslar tuwralı maǵlıwmatlar berildi.
Ilaj dawamında qatnasıwshılar qánigelerden ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi.