Tashkent qalasındaǵı Xalıqaralıq kongress orayında 26-fevral kúni Pakistan Islam Respublikası Bas ministri Shahboz Sharifti rásmiy kútip alıӯǵa baǵıshlanǵan saltanatlı máresim bolıp ótti.

Ózbekstan Respublikası Prezidenti Shavkat Mirziyoev joqarı mártebeli miymandı qızǵın qutlıqlap, minberge mirát etti. Áskeriy orkestr eki mámlekettiń gimnlerin atqardı.
Jetekshiler húrmetli qarawıl qatarı aldınan ótip, rásmiy delegaciyalar aǵzaların bir-birine tanıstırdı.
Bunnan soń Ózbekstan Respublikası Prezidenti Shavkat Mirziyoev hám Pakistan Islam Respublikası Bas ministri Shahboz Sharif tar sheńberde hám rásmiy delegaciyalar qatnasıӯında sóylesiӯler ótkerdi.
Ózbekstan-Pakistan strategiyalıq sheriklik qatnasıqların jáne de keńeytiw hám bekkemlewdiń barlıq baǵdarları kórip shıǵıldı.
Sóylesiw aldında Pakistan Bas ministri Shahboz Sharif shın kewilden qabıllaǵanı ushın Prezidentimizge minnetdarshılıq bildirdi.
Mámleket basshıları keyingi jılları kóp táreplemeli birge islesiw jedel rawajlanıp atırǵanın úlken qanaatlanıwshılıq penen atap ótti.
Jedel siyasiy sóylesiwler, nátiyjeli parlamentleraralıq hám uyımlararalıq almasıwlar dawam etpekte.
2024-jılı tovar almasıw kólemi 400 million dollardan astı, birgeliktegi kárxanalardıń sanı 130 ǵa jetti. Karachi hám Tashkentte sawda úyleri ashıldı. Tashkent hám Lahor arasında tikkeley aviaqatnawlar tiklendi.
Húkimetleraralıq komissiya májilisi, biznes forumları hám Ózbekstan milliy sanaat kórgizbesi tabıslı ótkerildi.
Sóylesiwlerde sawda-ekonomikalıq birge islesiwdi keńeytiw máselelerine ayrıqsha itibar qaratıldı.
Qabıl etilgen «jol kartası» tiykarında tovar almasıw kólemin 2 milliard dollarǵa jetkeriw boyınsha óz-ara muwapıqlasqan ilajlar kóriw zárúr ekenligi atap ótildi.
Jeńilletilgen sawda haqqındaǵı kelisim sheńberinde tovarlar dizimin keńeytiw, fitosanitariya hám karantin talapların, bajıxana tártip-qaǵıydaların óz-ara ápiwayılastırıw, standartlardı jaqınlastırıw, elektron sawda platformaların integraciyalaw, satıp alıwlarda qatnasıw imkaniyatın támiyinlew, bankleraralıq esap-sanaqlar mexanizmlerin jetilistiriw hám basqalar baslı wazıypalar sıpatında belgilendi.
Jetekshi kompaniyalardıń farmacevtika, elektrotexnika, awıl xojalıǵı mashina qurılısı, geologiya hám mineral resurslar, toqımashılıq, bılǵarı sanaatı hám basqa da tarmaqlarda kooperaciyalıq joybarlardı ámelge asırıw rejeleri kórip shıǵıldı.
Aymaqlar arasındaǵı isbilermenlik hám mádeniy baylanıslardı qollap-quwatlaw maqsetinde mámleketimiz basshısı Ózbekstanda eki mámleket aymaqları forumın ótkeriwdi usınıs etti.
Ózbekstan hám Pakistan jetekshileri transport jaǵınan óz-ara baylanıslılıqtı kúsheytiw hám tranzit imkaniyatın júzege shıǵarıw máselelerine ayrıqsha toqtap ótti.
Keyingi bir neshe jılda «Ózbekstan – Awǵanstan – Pakistan» multimodal koridorı arqalı júk tasıw kólemi 5 esege kóbeygeni qanaatlanıwshılıq penen atap ótildi. Júk aylanısı kólemin jáne de arttırıw maqsetinde transport-logistika kompaniyasın shólkemlestiriwge kelisip alındı.
Transawǵan temir jolın qurıw joybarın ámelde orınlaw maqsetinde birgeliktegi háreketlerdi muwapıqlastırıw áhmiyetli ekeni atap ótildi.
Húkimetleraralıq komissiyanıń gezektegi májilisin bıyıl iyul ayında Lahor qalasında ótkeriwge kelisip alındı.
Tárepler mádeniy-gumanitarlıq hám turizm almasıwın jáne de keńeytiw zárúr ekenligin atap ótti. Usı mánide, óz-ara Mádeniyat háptelikleri hám turizm baǵdarlamalarınıń prezentaciyaların ótkeriwge kelisip aldı.
Xalıqaralıq hám regionallıq áhmiyetke iye áhmiyetli máseleler boyınsha da pikir alısıldı. Birlesken Milletler Shólkemi, Qosılmaw háreketi, Islam birge islesiw shólkemi, ShBSh hám basqa da kóp tárepleme strukturalar sheńberinde óz-ara qollap-quwatlawdı dawam ettiriw zárúr ekenligi atap ótildi.
Ózbekstan Prezidenti hám Pakistan Bas ministri terrorizm, radikalizm, islamofobiya hám qáwipsizlikke qáwip salıp atırǵan basqa da zamanagóy qáwip-qáterlerge qarsı gúresiwde háreketlerdi birlestiriw zárúr ekenligin atap ótti.

Keń kólemli birge islesiwdiń jańa baǵdarların islep shıǵıw maqsetinde Joqarı dárejedegi strategiyalıq sheriklik keńesin shólkemlestiriw hám onıń birinshi májilisin kelesi jılı ótkeriwge kelisip alındı.
Joqarı dárejedegi sóylesiwler sońında erisilgen kelisimler hám qol qoyılǵan kelisimlerdi óz waqtında ámelge asırıw boyınsha birgeliktegi «jol kartası»n islep shıǵıw hám tastıyıqlaw haqqında qarar qabıl etildi.
Sóylesiwler sońında Ózbekstan Respublikası Prezidenti Shavkat Mirziyoev hám Pakistan Islam Respublikası Bas ministri Shahboz Sharif kóp táreplemeli Ózbekstan-Pakistan birge islesiwin jáne de rawajlandırıw hám bekkemlewge qaratılǵan Birgeliktegi deklaraciya hám eki tárepleme Joqarı dárejedegi strategiyalıq sheriklik keńesin dúziw haqqındaǵı bildiriwge qol qoydı.
Eki mámleket jetekshileri qatnasıwında sapar dawamında qol qoyılǵan tómendegi hújjetler almasıldı:
– Ilim, texnika hám innovaciyalar tarawındaǵı birge islesiw haqqında kelisim;
– Diplomatiyalıq pasport iyeleriniń vizasız saparları haqqındaǵı kelisim;
– Ishki isler ministrlikleri arasındaǵı birge islesiw haqqındaǵı kelisim;
– Professional bilimlendiriw tarawındaǵı birge islesiw haqqındaǵı kelisim;
– Jaslarǵa baylanıslı siyasat tarawındaǵı birge islesiw haqqındaǵı kelisim;
– Milliy málimleme agentlikleri arasındaǵı birge islesiw haqqında kelisim;
– diplomatiyalıq akademiyalar, Tashkent hám Lahor qalaları arasındaǵı birge islesiw haqqındaǵı kelisimler hám birgeliktegi sheshimler hám basqa hújjetler.
Ǵalaba xabar quralları ӯákilleri menen ushırasıӯda Ózbekstan Respublikası Prezidenti Shavkat Mirziyoev hám Islam Respublikası Bas ministri Shahboz Sharif bolıp ótken sóylesiӯler juӯmaǵına túsinik berdi.
Mámleketimiz basshısı sóziniń basında ushırasıwlar nátiyjeli bolǵanın ayrıqsha atap ótip, bul tariyxıy sapar Ózbekstan – Pakistan strategik sherikliginde jańa bet ashıwın atap ótti.
Ózbekstan Prezidenti keyingi jılları eki tárepleme birge islesiw jedel rawajlanıp barıp atırǵanın joqarı bahaladı.
Húkimetleraralıq komissiya nátiyjeli jumıs alıp barmaqta, siyasiy másláhátlesiwler, bir qatar isbilermenlik ilajları hám Ózbekstan sanaat kórgizbesi tabıslı ótkerildi.
Joqarı dárejedegi sóylesiwler dawamında tárepler kór táreplemeli birge islesiwdiń jańa “ósiw noqatları”n belgilep alǵanı, Joqarı dárejedegi strategiyalıq sheriklik keńesin shólkemlestiriwge kelisip alınǵanı atap ótildi.
Óz-ara sawda kólemin keskin arttırıw hám nomenklaturasın keńeytiw, sanaat kooperaciyasın kúsheytiw, transport jaǵınan óz-ara baylanıslılıqtı rawajlandırıw, biznesti qollap-quwatlaw hám oǵan qolaylı sharayatlar jaratıw máseleleri dıqqat orayında boldı.
Global hám regionallıq strukturalar, sonıń ishinde, Birlesken Mmlletler Shólkemi, Islam birge islesiw shólkemi, Shanxay birge islesiw shólkemi hám basqalar sheńberindegi tıǵız baylanıslar hám óz-ara qollap-quwatlawdı dawam ettiriwge kelisip alındı.
Awǵanstandı tınısh rawajlandırıw, Palestina máselesin diplomatiyalıq jol menen sheshiw boyınsha poziciyalar tıǵız ekeni atap ótildi.
Sonıń menen birge, qáwipsizlik tarawında, terrorizm, transmilliy jınayatshılıq, náshebentlik elementlerdiń nızamsız túrde aylanıwı hám basqa zamanagóy qáwip-qáterlerge qarsı gúresiw boyınsha birge islesiwdi keńeytiwden eki tárep te paydalı ekeni bildirildi.
Sóylesiwlerde mádeniy-gumanitarlıq hám turizm tarawlarındaǵı almasıwdı rawajlandırıwǵa ayrıqsha itibar qaratıldı. Mádeniyat hám kórkem óner festivalların óz-ara ótkeriw, sayaxatshılar aǵımın, sonıń ishinde, “Umra plyus” baǵdarlaması sheńberinde asırıw boyınsha kelisimlerge erisildi.
Soń Ózbekstan Respublikası Prezidenti Shavkat Mirziyoev hám Pakistan Islam Respublikası Bas ministri Shahboz Sharif Ózbekstan –Pakistan biznes forumında qatnastı.
Ilajda eki mámleket jetekshi kompaniyalarınıń 300 ge shamalas basshıları hám wákilleri qatnastı. Pakistan tárepinen “Al-Rafique Enterprises,” “Mehran Dates Products”, “Brighto Chemicals”, “Transfopower Industries”, “FWO”, “T.M.C”, “Pakistan Mobile”, “TCS” hám basqa kóplegen kompaniyalar qatnastı.

Mámleketimiz basshısı óziniń shıǵıp sóylegen sózinde bolıp ótken nátiyjeli sóylesiwlerde kóp táreplemeli sheriklikti jáne de keńeytiw máseleleri hár tárepleme dodalanǵanı, úlken reje hám wazıypalar belgilep alınǵanın atap ótti. Joqarı dárejedegi strategiyalıq sheriklik keńesin dúziwge kelisip aldı.
Sawda-ekonomikalıq birge islesiw eki tárepleme baylanıslardıń “lokomotivi” sıpatında belgilendi.
-Úlken potencialǵa iye bolǵan ekonomikalarımız biri-birin tolıqtıra aladı,-dedi Prezidentimiz.
Ótken jıldıń juwmaqlarına bola, tovar almasıw kólemi sezilerli dárejede arttı, bir qatar iri birgeliktegi kompaniyalar jumıs alıp barmaqta. Usı tárepten Ózbekstan Pakistannıń Oraylıq Aziyadaǵı eń iri sawda sherigine aylandı.
Sońǵı jılları biznes ushın qolaylı sharayatlar jaratıw boyınsha ilajlar jedel ámelge asırılmaqta. Lahor menen aviaqatnawlar tiklendi, reysler sanın kóbeytiw hám párwaz geografiyasın keńeytiw rejelestirilgen. Biznes forumları, sanaat kórgizbeleri ótkerilmekte. Karachi hám Tashkent qalalarında sawda úyleri shólkemlestirilgen.
Ózbekstan –Pakistan birge islesiwi jańa joybarlar menen bayımaqta. “Pak Merit”, “Diamond Group”, “Silk-way”, “Getz Pharm”, “Gerbion”, “NLS” hám basqa kompaniyalar menen joybarlar ámelge asırılmaqta.
Mámleketimiz basshısı eki tárepleme birge islesiwdi jáne de keńeytiw boyınsha bir qatar usınıslardı alǵa qoydı.
Bárinen burın, jılına keminde eki márte –Ózbekstan hám Pakistan biznes wákillerin keńnen tartqan halda isbilermenlik ilajların turaqlı túrde ótkerip barıw áhmiyetli ekenligi atap ótildi.
Geografiyalıq jaqınlıqtı esapqa alıp, tovar almasıw kólemin keskin arttırıw, sonıń ishinde, ámeldegi Jeńillikli sawda haqqındaǵı kelisim sheńberinde tovarlar nomenklaturasın ápiwayılastırıw, bankler aralıq esap-sanaqlar mexanizmlerin jetilistiriw kerek ekenligi kórsetip ótildi.
Qıtaydı Oraylıq Aziya menen baylanıstıratuǵın temir jol qurılısı baslanǵanı minnetdarshılıq penen atap ótildi. Keleshekte bul strategiyalıq jol Pakistan portlarına alıp shıǵıwı múmkin, bul bolsa óz-ara sawda hám investiciyalardı sezilerli dárejede arttırıwǵa xızmet etedi.
Sanaat kooperaciyasın jedel rawajlandırıw mámleketlerimizdiń túpkilikli máplerine sáykes.
Aymaqlararalıq birge islesiw potencialınan nátiyjeli paydalanıw kerek ekenligi atap ótildi. Usı mániste, aymaqlar basshılarınıń óz-ara keliwlerin jedellestiriw, onda eki mámleket isbilermen sheńberlerin keńnen tartıw áhmiyetli ekenligi atap ótildi.
Pakistan bas ministri Shahboz Sharif, óz gezeginde, Ózbekstan Respublikası Prezidenti Shavkat Mirziyoevtiń basshılıǵında ámelge asırılıp atırǵan keń kólemli reformalar baǵdarlamasın , sonday-aq, biznes júrgiziw ushın jaratılǵan sharayatlardı joqarı bahalap, sheriklikti keńeytiw ushın úlken imkaniyatlar bar ekenligin atap ótti.
Sonıń menen Pakistan Islam Respublikası Bas ministri Shahboz Shariftiń Ózbekstanǵa rásmiy saparı juwmaqlandı.

ÓzA