Nókis qalasında futzal boyınsha Qaraqalpaqstan XXІ chempionatı bolıp ótti.

Chempionatqa respublikamızdıń barlıq aymaqları, ministrlik hám joqarı oqıw orınlarınan dúzilgen 22 komanda qatnastı.
Eń dáslep komandalar bir toparda óz-ara oyınlar ótkerip, toparda eń kóp upay toplaǵan segiz komanda sherek finalǵa jol aldı.
Qızıqlı ótken sherek final oyınlarında topar jetekshisi «Panterra» komandası 8-orındı iyelegen «Mehrjon», «QMU-2» – «Hududgaz», «QMU-1» Ayrıqsha jaǵdaylar basqarması, «SKUF-2» – «IIM» komandaları menen óz-ara ushırastı hám bul oyınlarda «Panterra», «QMU-2», «QMU-1» hám «SKUF-2» komandaları óz qarsılasların jeńip shıǵıp, yarım finalǵa jollamanı qolǵa kirgizdi.
Al, yarım final oyınlarda bolsa, «Panterra» «QMU-1» komandasın 3:2, «SKUF-2» «QMU-2» komandasın 4:1 esabında jeńip shıǵıwǵa eristi.
Bunnan soń chempionattıń úshinshi orını ushın Berdaq atındaǵı Qaraqalpaq mámleketlik universitetiniń «QMU-1» «QMU-2» komandaları óz-ara bellesip, onda «QMU-1» komandası jeńiske eristi hám chempionattıń qola medalın jeńip aldı.
«Panterra» hám «SKUF-2» komandaları arasında ótkerilgen chempionlıq oyınında bolsa, «Panterra» komandasına áwmet kúlip baǵıp, olar óz qarsılasların 3:2 esabında jeńiwge eristi hám futzal boyınsha ótkerilgen Qaraqalpaqstan XXІ chempionatınıń jeńimpazına aylandı.
Sonday-aq, chempionatta «Eń jaqsı hújimshi», «Eń jaqsı dárwazaman» hám «Eń jaqsı futzalshı» nominaciyaları boyınsha jeńimpazlar anıqlandı.
Chempionat sońında jeńimpaz komandalar hám nominaciya iyeleri shólkemlestiriwshiler tárepinen múnásip túrde sıylıqlandı.
Jeńimpazlardı sıylıqlaw máresimine Qaraqalpaqstan Respublikası Ministrler Keńesi Baslıǵınıń orınbasarı R.Zarikeevler qatnastı.

Adilbay Orazov,
Qaraqalpaqstan xabar agentliginiń sholıwshısı.