Ózbekstan Respublikası Prezidenti Shavkat Mirziyoev 26-fevral kúni bolıp ótken telefon arqalı sóylesiwde Túrkiya Respublikası Prezidenti Rejep Tayyib Еrdoǵandı tuwılǵan kúni menen qızǵın qutlıqladı.

Mámleketimiz basshısı Túrkiya jetekshisine densawlıq, abadanlıq, tuwısqan túrk xalqınıń turaqlı rawajlanıwı jolındaǵı juwapkershilikli jumısında úlken tabıslar tiledi.
Zamanagóy Túrkiyanıń qurılıwında, mámlekettiń globallıq kólemdegi abırayınıń artıwında, Ózbekstan-Túrkiya keń kólemli strategiyalıq sheriklik qatnasıqlarında búgingi joqarı dárejege kóteriliwinde Prezident Rejep Tayyip Еrdoǵannıń ornı hám jeke úlesi ayrıqsha atap ótildi.
Hár qıylı dárejelerde jedel, nátiyjeli sóylesiwler ham almasıwlar dawam etip, sawda-ekonomikalıq hám mádeniy-gumanitarlıq tarawlardaǵı ámeliy birge islesiw potencialı artıp atırǵanı úlken qanaatlanıwshılıq penen atap ótildi.
Investiciyalar, innovaciyalar, energetika, infrastruktura, densawlıqtı saqlaw, bilimlendiriw hám basqa da tarawlarda birgelikte kooperaciyalıq joybarlardı alǵa qoyıwdıń áhmiyeti atap ótildi.
Mámleket basshıları Joqarı dárejedegi strategiyalıq birge islesiw keńesiniń gezektegi májilisi hám Túrkiy mámleketler shólkemi sheńberindegi bolajaq sammitlerdiń kún tártibin tayarlaw máselelerine ayrıqsha itibar qarattı.
Xalıqaralıq áhmiyetke iye máseleler boyınsha da pikir alısıldı.
Sóylesiw juwmaǵında jetekshiler pútkil musulman úmmeti ushın muqqaddes bolǵan Ramazan ayı kirip keliwi múnásibeti menen birin-biri qutlıqlap, dos Ózbekstan hám Túrkiya xalıqlarına tınıshlıq-tatıwlıq, abadanlıq hám rawajlanıw tiledi.

ÓzA