Berdaq atındaǵı Qaraqalpaq mámleketlik universitetinde Ózbekstan Respublikası Prezidentiniń 2025-jıl 3-yanvardaǵı «Respublika máhállelerinde qáwipsiz ortalıqtı jaratıw hám huqıqbuzarlıqlardıń erte aldın alıw sistemasınıń nátiyjeliligin bunnan bılay da arttırıw boyınsha ilajlar haqqında»ǵı qararı sheńberinde úgit-násiyat ilajı bolıp ótti.

Ilajda Qaraqalpaqstan Respublikası Prokurorınıń orınbasarı Sherzad Muxamatov, Qaraqalpaqstan Respublikası Ishki isler ministriniń orınbasarı Baxıtjan Izbasarov, «Nuraniy» qorı Qaraqalpaqstan Respublikası bólimi baslıǵı Tursınbay Abdijapparov, Ruwxıylıq hám aǵartıwshılıq orayı Qaraqalpaqstan Respublikası bólimi baslıǵı Tatlımurat Atamuratov, miynet veteranı Biybiayım Yusupova, nuraniy ustaz Begdulla Sultanov, universitet professor-oqıtıwshıları hám student-jasları qatnastı.
Ilajdı Berdaq atındaǵı Qaraqalpaq mámleketlik universitetiniń oqıw isleri boyınsha prorektorı O.Duysenbaev ashtı hám basqarıp bardı.
Ilaj dawamında máhállelerde qáwipsizlikti támiyinlew, huqıqbuzarlıqlardıń aldın alıw hám jınayashılıqqa qarsı gúresiw baǵdarında ámelge asırılıp atırǵan ilajlar haqqında sóz etildi.
Ilajda shıǵıp sóylegenler Ózbekstan Respublikası Prezidenti Shavkat Mirziyoevtiń 2025-jıl 14-fevral kúni mámleket jasları menen ótkergen ushırasıwında alǵa qoyılǵan áhmiyetli máseleler hám jaslarǵa jaratılıp atırǵan imkaniyat hám qolaylıqlar haqqında da keń túrde aytıp berdi. Sonday-aq, ilajda jaslarǵa baylanıslı mámleketlik siyasattı bunnan bılay da jetilistiriw, olardıń huqıqıy sawatlılıǵın arttırıw, hár qıylı unamsız aǵımlardıń tásirine túsip qalıwınıń aldın alıw máselelerine ayrıqsha itibar qaratıldı.
Usılar menen bir qatarda, ilaj dawamında jaslardıń huqıqıy sanasın ele de keńeytiw, olardı jınayashılıqtan qorǵaw maqsetinde universitette huqıqıy bilimlerdi úgit-násiyatlaw boyınsha arnawlı baǵdarlamalar islep shıǵılıwı hám ámelge asırılıwı zárúrligi atap ótildi.
Huqıq qorǵaw uyımlarınıń wákilleri tárepinen jınayashılıqtıń aldın alıwǵa qaratılǵan mámleketlik siyasat, aymaqlardaǵı profilaktikalıq ilajlar, kiberjınayatshılıqtıń aldın alıw boyınsha alıp barılıp atırǵan jumıslar boyınsha maǵlıwmatlar berildi.
Ilaj sońında studentler tárepinen taraw qánigelerine sorawlar berilip, olarǵa juwaplar aldı. Sonday-aq, jaslarǵa huqıqıy mádeniyat hám puqaralıq juwapkershilikti arttırıwǵa qaratılǵan arnawlı usınıslar berildi.
-Bunday ilajlardıń turaqlı túrde shólkemlestiriliwi jaslarda huqıqıy sana-sezim hám mádeniyattı arttırıwǵa, sonday-aq, jámiyette huqıqbuzarlıqlardıń aldın alıwǵa xızmet etedi,-deydi universitet oqıtıwshısı Paraxatdin Orınbaev.

Qaraqalpaqstan xabar agentligi