Ózbekstan Respublikası Oliy Majlisi janındaǵı Puqaralıq jámiyeti institutların qollap-quwatlaw jámiyetlik fondı qarjıların basqarıw boyınsha Parlament komissiyasınıń májilisi bolıp ótti.

Bizge belgili, «Ózbekstan-2030» strategiyası, 2021-2025-jılları puqaralıq jámiyetin rawajlandırıw koncepciyasınıń orınlanıwın támiyinlew maqsetinde Ózbekstan Respublikası Prezidentiniń 2024-jıl 26-avgusttaǵı pármanı menen Ózbekstan Respublikası Oliy Majlisi janındaǵı Puqaralıq jámiyeti institutların qollap-quwatlaw jámiyetlik fondı qayta shólkemlestirilgen.
Párman menen Jámiyetlik fondtıń qarjıların basqarıw boyınsha Parlament komissiyası hám Jámiyetlik fondqa puqaralıq jámiyeti institutların mámleket tárepinen jańa sistemada qollap-quwatlawǵa qaratılǵan áhmiyetli wazıypalar belgilep berilgen.
Oliy Majlis Nızamshılıq palatası hám jergilikli keńesler ushın 2024-jılı oktyabr ayında bolıp ótken saylawdan keyin deputatlar hám Senat aǵzalarınan qáliplestirilgen jańa quramdaǵı Parlament komissiyasınıń dáslepki májilisinde puqaralıq jámiyeti institutların mámleket tárepinen qollap-quwatlawdıń ashıq-aydın hám salamat báseki principine tiykarlanǵan jańa sistemasınıń jaratılǵanı atap ótildi.
Atap aytqanda, mámleketlik hám jámiyetlik turmısta puqaralıq jámiyeti institutlarınıń belsendiligin jáne de arttırıw, orınlardaǵı áhmiyetli mashqalalardı sheshiwge qaratılǵan baslamalardı júzege shıǵarıwǵa járdemlesiw, mámleketlik uyımlar menen sociallıq sheriklikti rawajlandırıw, jámiyetlik turmıstıń barlıq tarawlarında tásirsheń jámiyetlik qadaǵalaw alıp barıwdı qollap-quwatlaw sıyaqlılar puqaralıq jámiyeti institutların mámleket tárepinen qollap-quwatlawdıń tiykarǵı baǵdarları etip belgilengen.
Májiliste Jámiyetlik fondtıń 2024-jıldaǵı jumısı tallanıp, 2025-jıldaǵı jumısınıń tiykarǵı baǵdarları dodalandı. Aytılǵanınday, usı jılı puqaralıq jámiyeti institutların mámleket tárepinen qollap-quwatlawdıń jańa sisteması engizilmekte.
Máselen, Parlament komissiyası aǵzaları hám Jámiyetlik fond wákillerinen ibarat jumısshı topar aymaqlarǵa barıp, xalıq penen sóylesiwler shólkemlestirgen halda onıń talapların, sociallıq taraw hám máhálleler sistemalarındaǵı anıq mashqalalardı úyreniwi hám olardıń sheshimleri boyınsha usınıslar islep shıǵıwı belgilengen. Tallawlar nátiyjesine bola, hár bir aymaqqa mólsherlengen, mashqalalardıń mánzilli hám nátiyjeli sheshimine qaratılǵan tańlawlardı járiyalaw rejelestirilmekte.
Tańlawlardıń ashıq-aydınlıǵın hám processlerdiń operativligin támiyinlew maqsetinde bolsa mámlekettiń sociallıq buyırtpası hám grantların ajıratıw menen baylanıslı barlıq processler ngo.gov.uz birden-bir platformasında ámelge asırıladı. Endigiden bılay bul platforma arqalı talaban shólkemniń joybardı tapsırıwı, Parlament komissiyası tárepinen kórip shıǵıw hám bahalaw processlerin baqlap barıw, dodalawlarda bolsa tikkeley qatnasıw imkaniyatı da bar.
Májilis sońında Parlament komissiyası tárepinen 2025-jıl ushın «Ózbekstan – 2030» strategiyası, 2021-2025-jılları puqaralıq jámiyetin rawajlandırıw koncepciyası, «Qorshaǵan ortalıqtı qorǵaw hám «jasıl ekonomika» jılı» mámleketlik baǵdarlamasında názerde tutılǵan wazıypalardı ámelge asırıw hám puqaralıq jámiyeti institutlarınıń qorshaǵan ortalıqtı qorǵaw, xalıqtıń densawlıǵın saqlaw, bántligin támiyinlew, bilimlendiriw hám basqa da tarawlardaǵı áhmiyetli baslama hám joybarların qollap-quwatlawǵa qaratılǵan bir qatar baǵdarlamalar qabıl etildi.

N.ABDURAIMOVA,
ÓzAnıń xabarshısı